بھٹکل میں ہوئے دو مختلف سڑک حادثوں میں پانچ شدید زخمی؛ ایک زخمی کے علاج کےلئے مالی تعائون کی اپیل
بھٹکل 13/ستمبر(ایس او نیوز) بدھ کی شام کو پیش آئے دو مختلف سڑک حادثوں میں پانچ لوگ شدید زخمی ہوئے ہیں جس میں دو کی حالت نازک بتائی گئی ہے۔
پہلا حادثہ شام قریب آٹھ بجے ساگر روڈ پر پیش آیا جب ایک بائک نے راہ چلتے شخص کو ٹکر ماردی، ٹکر لگنے سے ایک طرف راہ گیر شدید زخمی ہوگیا، وہیں بائک سوار بھی بائک سے گر کر شدید زخمی ہوگیا۔ راہ چلتے شخص کی شناخت بیلنی کے رہنے والے گوندا دیوڑیگا کی حیثیت سے کی گئی۔ اس کے سر کو شدید چوٹ لگی ہے اور اُسے بھٹکل سرکاری اسپتال سے نازک حالت میں فوری طور پر اُڈپی سرکاری اسپتال منتقل کیا گیاہے۔ حادثے میں بائک سوار ستیش اچاری کی حیثیت سے کی گئی ہے جو ہنومان نگر کا رہنے والا ہے، اس کے ایک پیر کو شدید چوٹ لگی ہے اور اُسے بھی بھٹکل سرکاری اسپتال سے اُڈپی لے جایا گیا ہے۔
دوسرا حادثہ شام قریب نو بجے انفال سوپر مارکٹ کے پاس پیش آیا جب ایک بائک دوسری ایم 80 سواری کو ٹکر مار کر فرار ہوگئی۔ ٹکر لگتے ہی جیسے ہی ایک شخص نیچے گرا، دوسری بائک بے قابو ہوکر نیچے گرے ہوئے شخص پر چڑھ گئی، جبکہ بائک پر سوار دونوں لوگ بھی سڑک پر گرگئے۔ اس طرح حادثے میں تین لوگ شدید زخمی ہوگئے، جس میں ایم 80 سوار کی حالت نازک بتائی گئی ہے۔
ایم 80 سواری سے نیچے گرکر شدید زخمی ہونے والے کی شناخت آزاد نگر مسجد طوبیٰ کے قریب رہنے والے محبوب علی (35) کی حیثیت سے کی گئی ہے، اس کے سر کو شدید چوٹ لگی ہے اور بھٹکل سرکاری اسپتال میں ابتدائی طبی امداد کے بعد اسے اُڈپی اسپتال لے جایا گیاہے، جہاں اس کی حالت نازک بتائی گئی ہے ۔ بائک سے نیچے گر کر زخمی ہونے والے دیگر دو لوگوں کے نام معلوم نہ ہوسکے ۔
محبوب کے گھروالوں کی عوام الناس سے مدد کی اپیل: حادثے میں شدید زخمی ہونے والے محبوب علی کے گھروالوں نے خبر دی ہے کہ محبوب علی کو اُڈپی ادرش اسپتال میں آئی سی یو میں رکھا گیا ہے۔ گھروالوں نے عوام الناس سے اس کی صحت یابی کے لئے دُعا کرنے کی درخواست کرنے کے ساتھ ساتھ علاج کے لئے مالی تعائون کی بھی اپیل کی ہے۔
محبوب علی کے تعلق سے انفاء اسپورٹس سینٹر کے مولانا محمد انصار خطیب مدنی نے تصدیق کی ہے کہ ان کی مالی حالت واقعی مستحکم نہیں ہے اور اسپتال کا خرچہ گھروالوں کے لئے ناقابل برداشت ہے۔ لہٰذا انہوں نے بھی صاحب خیر حضرات سے درخواست کی ہے کہ اس نوجوان کے علاج کے لئے ہرممکن مالی تعاون کیا جائے۔
مالی تعاون یا مزید تفصیلات کے لئے محبوب علی کے قریبی رشتہ دار محمد علی سے موبائل نمبر 9916475338/ 9986685921 پر رابطہ کرسکتے ہیں۔