بھٹکل میں تحصیلدار کے حکم پر ہیلتھ انسپکٹر نے ضبط کئے سمندری سیپیں؛ جانچ کے لئے مینگلور روانہ؛ خرید وفروخت پر لگائی پابندی
بھٹکل 18/فروری (ایس او نیوز) تعلقہ بھر میں سمندری سیپیاں کھانے سے بیمار پڑنے کے معاملات میں اضافہ کو دیکھتے ہوئے تعلقہ انتظامیہ نے حفاظتی اقدامات کے طور پر ان سیپیوں کی خرید وفروخت پر بھٹکل میں پابندی عائد کردی ہے ۔ اس تعلق سے آج پیر کو جیسے ہی سمندری سیپیاں بھٹکل مچھلی مارکٹ میں پہنچی، میونسپل ہیلتھ انسپکٹر سوجیا نے ان سیپیوں کو فوری اپنی تحویل میں لیتے ہوئے مختلف تھیلوں میں سے دس بارہ سیپیوں کو نمونے کے طور پر حاصل کیا اور اُسے جانچ کے لئے مینگلور میں محکمہ فشریس کی لیباریٹری میں روانہ کردیا ۔
تحصیلدار وی این باڈکر نے بتایا کہ سمندری سیپیوں کا سالن استعمال کرنے سے بھٹکل میں گذشتہ ایک ہفتے میں سو سے زائد لوگ بیمار ہوئے ہیں، جس کو دیکھتے ہوئے شبہ ہے کہ سیپیوں میں فارمولین نامی کیمیکل استعمال کیا گیا ہے ، جس کی وجہ سے لوگ بیمار ہوئے ہیں۔ واضح رہے کہ تعلقہ کے شرالی، مرڈیشور سمیت بھٹکل شہر کے بھی کافی لوگ سیپیاں کھانے سے بیمار ہونے کی اطلاعات ہیں۔
تحصیلدار نے بتایا کہ ایک دو دن میں لیباریٹری سے رپورٹ آنے کی توقع ہے ، تب تک سیپیوں کی خرید وفروخت پر پابندی عائد کردی گئی ہے۔