بھٹکل:13/اگست (ایس اؤنیوز)قومی شاہراہ 66کی توسیع کرتے ہوئے فورلین میں منتقل کرنےکےلئے جاری کاموں کےلئے زمین حصولیابی کے سلسلے میں اترکنڑا ڈپٹی کمشنر کی طرف سے احکامات جاری کئے جانےکے بعد زمین حصولیابی کے خصوصی آفیسر اور بھٹکل کے اے سی ایم این منجوناتھ نے بھی سرکلر جاری کرتے ہوئے کہاہے کہ جولوگ فورلین کی تعمیر کو لے کر اپنی زمینات کھو چکے ہیں، ان کے معاوضہ ادائیگی کے لئے آخری تاریخ طئے کی جاچکی ہے، اگر متعینہ تاریخ میں معاوضہ نہیں لیا جاتاہے تو زمینات کو نیشنل ہائی وے اتھارٹی طبیعی طورپر اپنی تحویل میں لے گی ۔

اس سلسلے میں ایم این منجوناتھ نے پریس ریلیز جاری کرتے ہوئے کہاہے کہ فورلین کی تعمیر کو لےکر ہوناور اور بھٹکل تعلقہ جات میں زمین حصولیابی کے لئے 3ڈی نوٹیفکیشن جاری کیاجاچکاہےاور آئی فیصلہ کی بھی تصدیق ہوگئی ہے۔ آئی فیصلے کے مطابق زمین مالکان ضروری دستاویزات پیش کرکے معاوضہ حاصل کریں۔ اس سلسلے میں زمین مالکان کو انفرادی نوٹس اور مقامی تحصیل افسران کے ذریعے بھی جانکاری دی جاچکی ہے۔ وقت مقررہ پر فورلین کی تعمیر کو مکمل کرلینا ہے ،متعینہ تاریخ کے اندر زمین مالکان اپنا معاوضہ لے لیں۔ اگر نہیں تو زمینات کو اتھارٹی اپنی تحویل میں لینے کی بات کہی گئی ہے۔