بھٹکل :18/ستمبر(ایس اؤ نیوز) بھٹکل میونسپالٹی کے بالمقابل واقع اٹل جی جنا اسنہیا کیندرا (نیمدی کیندرا) کو  کسی دوسری مناسب جگہ پر منتقل کرانے کی مانگ کرتے ہوئے بھٹکل کے سماجی کارکن اور بھٹکل بلدیہ کے نامزد کونسلر جناب فیاض مُلا نے کاروار ڈپٹی کمشنر کو میمورنڈم سونپا ہے۔

فیاض مُلا نے ڈپٹی کمشنر کو بتایا کہ  بھٹکل میں نیمدی کیندرا  کا تمام کام  ایک تنگ کمرے میں  انجام دینے کی وجہ سے ضروریات کے لئے پہنچنے والے عوام کو کافی دقت ہورہی ہے۔ انہوں نے بتایا کہ اس مرکز میں صرف دو کمپوٹر ہیں  جس میں ایک کمپوٹر پر آدھار کارڈ کا کام ہوتا ہے اور دوسرے کمپوٹر کے ذریعے  جگہوں کے نقشے، انکم اور ذات سرٹی فیکٹ،  سروے کے پیپرس اور دیگر کئی کام انجام دئے جاتے ہیں۔ مزید بتایا کہ اس چھوٹے سے کمرے میں عوام زیادہ تر آدھار کارڈ بنوانے  یا آدھار کارڈ میں ترمیم،  حذف و اضافہ کے لئے آتے رہتے ہیں، ایسے میں دیگر سرٹی فیکٹ یا  سروے کے کام کے لئے جانے  کچھ لوگوں کو جانے کی ضرورت پڑتی ہے تو  آدھار کارڈ کے لئے  لگی قطار کے لوگ اُن کو آگے جانے نہیں دیتے، جس سے  بعض دفعہ آپس میں تو تو میں میں شروع ہوجاتی ہے۔

فیاض مُلا نے میمورنڈم میں بتایا ہے کہ  چھوٹے سے کمرے میں پہنچنے کے لئے عورتوں اور بچوں کی بھیڑ لگی رہتی ہے، جس سے عوام کو سخت پریشانی جھیلنی پڑرہی ہے۔ انہوں نے ڈی سی سے مطالبہ کیا کہ ان تمام وجوہات کو سامنے رکھتے ہوئے عوامی سہولیات کی خاطر نیمدی کیندرا  کو کسی دوسری مناسب عمارت میں منتقل کیاجائے۔