منی پال ہیلتھ کارڈ 2017 خدمات کی شروعات ، بھٹکل کے عوام سے استفادے کی اپیل ؛ علاج پر 20 سے 50 فیصد تک رعایت
بھٹکل:یکم جون (ایس اؤ نیوز )منی پال کستوربا اسپتال کے منی پال ہیلتھ (آروگیہ) کارڈ کامیابی کے ساتھ 16سال مکمل کرنے کے بعد اب 17ویں سال میں قدم رکھا ہے۔ اور اس بار رواں سال آروگیہ کارڈ کے ساتھ منی پال ڈینٹل آروگیہ کارڈ مفت میں دینے کی سہولت فراہم کی گئی ہے۔ اس بات کی جانکاری اسپتال کے معاون مینجر موہن شٹی نے دی ۔
یہاں سینٹ ملاگریس سوسائٹی بھٹکل کے دفتر میں پریس کانفرنس کے ذریعے بات کرتے ہوئے انہوں نے کہاکہ رواں سال ممبرشپ بنانے کی آخری 31جولائی 2017ہے۔ 28مئی سے پہلے جتنے بھی لوگ رجسٹریشن کریں گے انہیں یکم جون سے 31جولائی 2018تک یعنی کل 14مہینے سہولیات فراہم کی جائیں گی ۔ 29مئی 2017سے 27جولائی 2017کے درمیان رجسٹرڈ کردہ ممبر ان کو یکم اگست 2017سے ایک سال تک سہولیات دی جائیں گی ۔
انہوں نے بتایا کہ اس ہیلتھ کارڈ کے ذریعے صرف 50فی صد فیس ادا کرکے ماہر اور تجربہ کار ڈاکٹروں سے سال میں جتنی بار چاہے اتنی مرتبہ جانچ کروا سکتے ہیں۔ لیباریٹری فیس میں%25فی صد کی رعایت دی جائے گی اور دوائی رسید کے ساتھ اسپتال کے فارمیسی میں خریدی جانے والی دوائیوں پر %10فی صد رعایت دی جائے گی ۔ فی ممبر فیس 225روپئے ہے جب کہ پورے خاندان کے لئے کارڈ بنانا ہے تو 520روپئے ادا کرنے ہونگے۔ ہر ایک فرد متعلقہ کارڈ بنوا سکتاہے۔ اس کارڈ کو 2یا 3مرتبہ استعمال کرتے ہیں تو اپنی طرف سے خرچ کردہ رقم کو علاج میں رعایت کے ذریعے واپس حاصل کر سکتےہیں۔ انہوں نے عوام سے متعلقہ کارڈ کے ذریعے استفادہ کرنے کی اپیل کی ۔ اس موقع پر ملاگریس سوسائٹی کے ڈائرکٹر مائیکل ڈیسوزا ، جے پنٹو وغیرہ موجود تھے۔