بھٹکل 18/فروری (ایس او نیوز)  کارگیدے مسجد مزمل کے سامنے پکی سڑک کی  تعمیر کو لے کر علاقہ کے عوام نے بھٹکل رکن اسمبلی سنیل نائک سے ملاقات کی اور سڑک کی خستہ حالی  سے اُنہیں واقف کراتے ہوئے  اوپری حصہ کی طرف زیرتعمیر سڑک کو آگے بڑھاتے ہوئے مسجد مزمل اور اس سے نیچے تک توسیع دینےکی اپیل کی۔

علاقہ کے لوگوں نے سُنیل نائک کو بتایا کہ مسجد کے اوپری حصہ میں  کانکریٹ روڈ کی تعمیر کا کام جاری ہے، اُسی کام کو آگے بڑھاتے ہوئے مسجد کے نیچے تک پکی سڑک کی تعمیر کی جانی چاہئے۔ لوگوں نے بتایا کہ  بارش کے موسم میں  مسجد مزمل کے سامنے اور اس کے اطراف کے سڑک کی حالت ایسی خستہ ہوجاتی ہے کہ پوری سڑک کیچڑ سے بھر جاتی ہے،اور  پاس پڑوس  کے عوام نماز کے لئے مسجد نہیں جاسکتےایسے میں مزمل مسجد کے اطراف کے عوام بالخصوص    بچوں کو اسکول اور کالج جانے میں سخت دشواری پیش آتی ہے، ایم ایل اے سے درخواست کی گئی کہ معاملے کی سنگینی کو دیکھتے ہوئے زیر تعمیر سڑک کو ہی   آگے بڑھاتے ہوئے  مسجد کے آگے تک  لے جانے کی درخواست کی گئی اور اس کے لئے درکار رقم کو منظور کرانے کا مطالبہ کیا گیا۔

رکن اسمبلی سنیل نائک نے اس موقع پر اپنے سکریٹری کو ہدایت جاری کی کہ ایم ایل اے فنڈ سے پانچ لاکھ روپیہ متعلقہ سڑک کے لئے  جاری کی جائے، ساتھ ساتھ انہوں نے جالی پٹن پنچایت کے چیف آفسر وینو گوپال شاستری کو طلب کرتے ہوئے اُنہیں ہدایت دی کہ وہ انجینر کے ساتھ متعلقہ علاقہ کا دورہ کرتے ہوئے  جائزہ لے اور فوری متعلقہ سڑک کی تعمیر کرتے ہوئے مسئلہ کو حل کرے۔

اس موقع پر علاقہ کے ذمہ داران جناب ارشادعسکری، یونس سُکری، مولانا سلمان کولاندوی، نوفل کھروری،  عبدالسمیع کھروری، حبّان شوپا،  شفیع شیخ، عنایت اللہ گوائی،  اور جالی پٹن پنچایت کے رکن  محمد بلال قمری موجود تھے۔