بھٹکل:7/ نومبر (ایس اؤنیوز)انجمن انسٹی ٹیوٹ آف ٹکنالوجی اینڈ مینجمنٹ کے زیر اہتمام بھٹکل اور نواحی علاقوں کے پی یو کالج طلبا کو اعلیٰ تعلیمی میدانوں کی طرف رہنمائی اور دیگر کورسس سے متعارف کرانے کے لئے 11نومبربروز سنیچر ایک روزہ فیسٹ منعقد کیا جائے گا۔ اس بات کی اطلاع کالج پرنسپال ڈاکٹر مشتاق احمد بھاوی کٹی نے پریس کانفرنس میں دی۔

انجمن انجنئیرنگ کالج بھٹکل میں منعقدہ پریس کانفرنس میں انہوں نے بتایا کہ ’’منی اسٹم فسٹ(Mini STEM Fest-2017)‘‘کے موضوع پر منعقد کئے جانے والا فیسٹ 2اہم زمرے ’’ماڈل ایکسپو‘‘ اور کوئز و مینیا‘‘پر مشتمل ہوگا۔ ۔پہلے زمرے کے ’’ماڈل ایکسپو‘‘میں طلبا اپنی مخفی صلاحیتوں کو عملی طورپر پیش کرنے کے لئے ایک بہترین موقع ہے۔ جہاں طلبا اپنی طرف سے تیار کردہ فزکس، کیمسٹری، ریاضی ، سائنس اور انجنئیرنگ کے ماڈلس کی نمائش کرتے ہوئے اس کی مختصر جانکاری دیں گے تو دوسرے زمرے ’’کوئزو مینیا‘‘میں معروضی سوالات کا جواب دیتے ہوئے اپنی علمی صلاحیت کا لوہا منوائیں گے۔ انہوں نے بھٹکل اور اطراف کے پی یو طلبا سے اپیل کی کہ طلبا انجمن کالج کی طرف سے فراہم کردہ بہترین موقع سے استفادہ کرتے ہوئے مختلف قسم کے ماڈلس پیش کریں اور کوئز میں شریک ہوکر فیسٹ کو کامیاب بنائیں۔ انہوں نے بتایا کہ اب تک قریب 40ٹیموں نےاپنا نام درج کراچکی ہیں۔ اس موقع پر نائب پرنسپال ایچ ایم پال چندرا اور پروفیسر بھاگوت موجود تھے۔