کاروار میں منعقد ڈسٹرکٹ لیول پرتیبھا کارنجی مقابلوں میں بھٹکل انجمن کی طالبہ کو قرات میں اول مقام
بھٹکل 8/اکتوبر (ایس او نیوز) کاروار میں منعقد ڈسٹرکٹ لیول پرتیبھا کارنجی مقابلوں میں بھٹکل کی نمائندگی کرتے ہوئے انجمن انگلش میڈیم ہائیر پرائمری اسکول کی طالبہ طِیاب بنت ڈاکٹر آفتاب احمد حاجی فقیہ (مرحوم) نے قرات مقابلے میں اول مقام حاصل کرتے ہوئے نہ صرف بھٹکل بلکہ انجمن کا بھی نام روشن کردیا۔ وہ ضلع کے مختلف تعلقہ جات سے ہائر پرائمری لیول کے قرات مقابلے میں شریک کئی بچوں کو شکست دیتے ہوئے بھٹکل کے لئے اول انعام حاصل کرنے میں کامیاب ہوئی ہیں۔
پریس ریلیز جاری کرتے ہوئے انجمن حامئی مسلمین بھٹکل کے صدر جناب عبدالرحیم جوکاکو نے بتایا کہ طِیاب نے اس سے قبل بھٹکل میں کلسٹر لیول پر اول مقام حاصل کرنے کے بعد تعلقہ لیول میں بھی اول مقام حاصل کیا تھا، جس کے بعد وہ ضلعی لیول کے لئے منتخب ہوئی تھی۔
طِیاب ضلعی لیول میں ٹاپ آنے کے بعد اب ریاستی سطح کے پرتیبھا کارنجی مقابلہ کے لئے منتخب ہوگئی ہے، جس کے تعلق سے ابھی اعلان نہیں ہوا ہے کہ ریاستی سطح کے مقابلے کب اور کہاں رکھے جائیں گے۔
قرات مقابلے میں اول آنے پر انجمن حامئی مسلمین کی طرف سے اُنہیں مبارکباد پیش کی گئی ہے اور توقع ظاہر کی گئی ہے کہ یہ طالبہ ریاستی سطح پر بھی اسی طرح بہترین پرفارمینس پیش کرتے ہوئے اُدھر بھی بھٹکل اور انجمن کا نام روشن کرے گی۔ اِدھر بھٹکل بلاک ایجوکیشن آفسر وینکٹیش پٹگار نے بھی ضلعی سطح پر ان کے اول مقام حاصل کرنے پر نہایت خوشی کا اظہار کرتے ہوئے مبارکباد پیش کی ہے۔
خیال رہے کہ پرتیبھا کارنجی پروگرام کا آغاز کاروار میں 6/اکتوبر کو کاروار ہندو ہائی اسکول میں ہوا تھا۔ تعلقہ پنچایت صدر پریملا نائک نے چراغ جلاتے ہوئے پروگرام کا افتتاح کیا تھا۔
