مرڈیشور28/ستمبر (ایس او نیوز)ساحلی علاقے کی سیاحی کے لئے مرڈیشور آنے والے دو طالب علم سمندری موجوں کا مزہ لینے کے لئے جب پانی میں اترے تو لہروں کی تیزی میں وہ بہہ گئے۔ قریب تھا کہ وہ پانی میں ڈوب کر ہلاک ہو جاتے، اسی وقت چند ماہی گیروں کی نظر ان پر پڑی اور انہوں نے آگے بڑھ کر ڈوبتے ہوئے طالب علموں کو بچا لیا۔

 کہاجاتا ہے کہ چترادرگہ ضلع کے چترا ہلّی گورنمنٹ کالج کے تقریباً 20طلباء سیر و تفریح کے لئے مرڈیشور پہنچے تھے۔حالانکہ سمندر میں تیز لہریں اٹھ رہی تھیں لیکن طلباء نے اس پر دھیان نہیں دیا اور سمندر میں اتر گئے۔ان میں سے یوواراج نائک اوروجئے کمار نامی دو طالب علم سمندری لہروں کے آگے بے بس ہوگئے اور ڈوبنے لگے تو ہاتھ ہلا کر مدد مانگنے کا اشارہ کرنے لگے۔جب یہ نظارہ ساحل پر موجود ماہی گیروں نے دیکھا تو ان میں سے منجو بابو ہری کانت، ابھی کوپّجا ہری کانت اور دنیش بابو ہری کانت اپنی چھوٹی سی کشتی (پاتی ڈونی) لے کر سمندر میں آگے بڑھے لیکن ان کی چھوٹی کشتی بھی سمندر کی تیز لہریں سنبھال نہ سکی اور وہ الٹ گئی۔ اس کے باوجود ماہی گیروں نے ہمت نہیں ہاری اور دونوں طالب علموں کو غرق ہونے سے بچالیا۔

SahilOnline Coastal news bulletin in URDU 28th Sep 2016