بنگلور سمیت ریاست کے جنوبی علاقوں میں موسلادھار بارش
بنگلورو،19؍مئی(ایس او نیوز) ریاست کی راجدھانی بنگلور سمیت جنوبی علاقوں میں کل شام سے دیر رات تک موسلادھار بارش ریکارڈ کی گئی۔ کل شام سے شہر کے بعض علاقوں میں بارش کا سلسلہ شدت کے ساتھ شروع ہوا۔ تیز ہواؤں کے نتیجہ میں شہر میں متعدد درخت، بجلی کے کھمبے وغیرہ اکھڑ گئے۔ماہرین موسمیات کے مطابق خلیج بنگال میں ہوا کے کم دباؤ کے نتیجہ میں کل یہ بارش ہوئی۔ اس ہفتہ کے اختتام تک بھی یہ سلسلہ برقرار رہنے کی توقع ظاہر کی گئی ہے۔ محکمۂ موسمیات کے ڈائرکٹر سرینواس ریڈی نے بتایاکہ نہ صرف بنگلور بلکہ رام نگرم، منڈیا، میسور ، ہاسن ، چامراج نگر، کولار، چکبالاپور، شیموگہ ، بنگلور رورل اضلاع میں بھی اسی طرح کی بارش ریکارڈ کی گئی ہے۔بنگلور میں کل 12 سنٹی میٹر بارش ریکارڈ کی گئی ۔ شہر کے مختلف علاقوں کی تفصیل دیتے ہوئے انہوں نے بتایاکہ بی ٹی ایم لے آؤٹ میں 19ایم ایم ، وی وی پورم میں 20 ایم ایم ، میسور روڈ میں34 ایم ایم ، ودھیا پیٹ میں 31.5ایم میں تاورکیرے میں 84 ایم ایم ، بسونگڈی میں 22ایم ایم ، کمن ہلی میں19.5ایم ایم ، آنیکل میں 50ایم ایم ، بنگلور ساؤتھ میں120ایم ایم، کوٹگے پالیہ میں42ایم ایم، کنگیری میں 119 ایم ایم، راجہ راجیشوری نگر میں73 ایم ایم، یشونت پور میں 22؍ ایم ایم ، راجہ جی نگر میں26ایم ایم بارش ریکارڈ کی گئی ہے۔میسور میں ہوئی موسلادھار بارش کے نتیجہ میں میسور مہانگر پالیکے کا دفتر ہی زیر آب آگیا۔رات ساڑھے دس بجے سے زور دار بجلیوں کے ساتھ شروع ہوئی بارش دیر رات تک جاری رہی جس سے شہر کے متعدد علاقوں میں عام زندگی درہم برہم رہی۔ مہانگر پالیکے دفتر میں پانی گھس جانے کے سبب یہاں کے کمپیوٹر اور دیگر آلات میں پانی بھرگیا۔فوری طور پر فائر فورس اور بی بی ایم پی عملے نے پانی کی نکاسی کا انتظام کیا۔ماہرین موسمیات نے بتایا ہے کہ بارش کا یہ سلسلہ مزید جاری رہ سکتاہے۔