بنٹوال:سیلون مالک پر حملے کا ملزم گرفتار۔ ہجوم پر پولیس کا لاٹھی چارج
بنٹوال2؍ستمبر(ایس او نیوز)پیسے کے لین دین کے معاملے میں ایک سیلون مالک پر حملے کے ملزم کو گرفتار کرتے وقت ہجوم جمع ہوگیا جسے منتشر کرنے کے لئے پولیس کو لاٹھی چارج کا سہارا لینا پڑا۔
موصولہ رپورٹ کے مطابق یہ واقعہ کلاڈکا میں 31اگست کو پیش آیا جب ہیئر کٹنگ سیلون کے مالک ستیش پر حملہ کرنے کے ملزم خلیل کو پولیس گرفتار کرنے پہنچی تو وہاں پر ہجوم جمع ہوا اور ماحول میں تناؤ پیدا ہوگیا جس پر قابو پانے کے لئے پولیس نے لاٹھی چارج کیا۔ خلیل کے بارے میں معلوم ہوا ہے کہ وہ ایک راؤڈی شیٹر ہے اور پولیس نے اس کو شہر بدر کرکے ہاسن بھیج دیا تھا۔
کہتے ہیں کہ سیلون کے مالک ستیش نے خلیل کو سود پر کچھ رقم دی تھی، جسے وہ لوٹا نہیں رہاتھا۔ اس لئے ستیش نے خلیل کے خلاف پولیس اسٹیشن میں شکایت درج کروادی۔ مبینہ طور پر اس سے ناراض ہوکر خلیل نے ستیش کے سیلون میں گھس کر حملہ کیا ۔ اس کا موبائل فون توڑ ڈالااور چاقو کی نوک پر اسے دھمکاتے ہوئے ’ہفتہ‘ دینے کامطالبہ کیا۔ پولیس نے ستیش کی شکایت پر خلیل کے خلاف قتل کی کوشش کا کیس درج کرکے اسے گرفتار کرلیا۔
رات کو ہوئے تناؤ کے بعد کلاڈکا میں اضافی پولیس فورس کو تعینات کردیا گیا ہے۔بنٹوال اسٹیشن آفیسر چندرا شیکھر کے ذریعے اس معاملے کی تحقیقات کی جارہی ہے۔