ہوناور کے ٹونکا میں سڑک کی مرمت اور کانکریٹ روڈ کا مطالبہ۔ رکشہ ڈرائیوروں کا احتجاج
ہوناور 10؍اکتوبر (ایس او نیوز) یہاں کے ٹونکا نامی علاقے میں سڑک کی انتہائی خراب حالت کے پیش نظر رکشہ ڈرائیوروں نے احتجاجی مظاہرہ کیا اور مطالبہ کیا کہ اس سڑک کی مرمت کی جائے اور اسے کانکریٹ روڈ میں تبدیل کیا جائے۔
احتجاجی مظاہرین کا کہنا تھا کہ کاسرکوڈ اور ٹونکا کے درمیان یہ ایک عوامی سڑک ہونے کی وجہ سے اس کی بدحالی سے عوام کو بہت زیادہ مشکلات کا سامنا کرنا پڑرہا ہے۔ دن رات مچھلیوں کے ٹرک، پاسنجر رکشہ اور دیگر سواریاں اس راستے پر دوڑتی رہتی ہیں۔بارش کے دوران اس سڑک کی حالت بہت ہی خستہ ہوگئی ہے۔ چونکہ یہاں 40فیصد کانکریٹ روڈ بنایا جاچکا ہے ، اس لئے مزید 60فیصدروڈ کو بھی کانکریٹ میں تبدیل کرنے کی مانگ رکشہ ڈرائیوروں کی طرف سے رکھی گئی ہے۔عوام بھی اس سڑک کی تعمیر اور مرمت کا مطالبہ کرکے تھک گئے ہیں۔ افسران بس ایک ہی جواب دیتے ہیں کہ ٹینڈر دیا گیا ہے، لیکن عملی طور پر ایک عرصے سے یہاں کام شروع نہیں کیا گیا ہے۔
احتجاجیوں نے وارننگ دیتے ہوئے کہا کہ اگر ایک مہینے کے اندر کانکریٹ روڈ بنانے کا کام شروع نہیں کیا تو پھر عوام کے تعاون سے شدید احتجاجی مظاہرے کا اہتمام کیا جائے گا۔