منگلورو:تیسری مرتبہ شادی کرنے کے چکر میں دولھا پہنچ گیا سلاخوں کے پیچھے
منگلورو24؍اگست (ایس او نیوز) پولیس نے ایک ایسے شخص کو گرفتار کرلیا ہے جس نے اپنی پچھلی دو شادیوں کے باوجود تیسری مرتبہ دھوکے سے ایک اور شادی رچانے کی تیاری کرلی تھی۔
اطلاع کے مطابق جپینا موگاروعلاقے کا رہنے والا اشوک کچھ دن پہلے خلیجی ملک سے واپس گھر آیا تھااور پڈوبیدری کی ایک لڑکی سے اتوار کے دن شادی رچانے والا تھا۔مگر کسی طرح اشوک کی منگیتر کو پتہ چل گیا کہ اشوک پہلے دو شادیاں کرچکا ہے تو اس نے پولیس کے پاس شکایت درج کروادی۔ لڑکی شکایت پر کارروائی کرتے ہوئے پولیس نے اشوک کو اس کے گھر سے گرفتار کرلیا جہاں شادی کی تیاریاں چل رہی تھیں۔
پولیس کے بیان کے مطابق اشوک نے قبول کیا ہے کہ اس نے اس سے پہلے دو لڑکیوں سے شادیاں کی تھیں۔ پہلے اس نے ایک سری لنکا کی لڑکی سے شادی کی تھی۔ پھر اس نے ایک اور مسلم لڑکی سے شادی رچانے کے لئے اسلام قبول کرکے اپنا نام اشفاق کرلیا تھا۔اور اس مسلم لڑکی سے شادی کی بنیاد پراس نے خلیجی ملک میں سرکاری نوکری بھی حاصل کرلی تھی۔اشوک کے بیان کے مطابق اب خلیجی ملک کے حالات زیادہ اچھے نہیں رہنے کی وجہ سے اس نے انڈیا واپس آنے اور یہاں پر ہند و لڑکی سے شادی کرنے کا فیصلہ کیا تھا۔