جانوروں کو ضبط کرنے کا سلسلہ جاری ؛ ہوناور چیک پوسٹ پر پھر پکڑی گئی جانوروں کی لاری۔ ایک گرفتار
ہوناور10؍اپریل (ایس او نیوز) دیر رات گئے ایک لاری میں رفت کیے جارہے 17جانوروں کو پولیس نے ضبط کرلیا، جس کے بارے میں پولس کا کہنا ہے کہ یہ سبھی جانور چوری کرنے کے بعد قصائی خانوں کو فراہم کیے جارہے تھے۔
کنڑا اخبارات میں شائع رپورٹوں کے مطابق اس ضمن میں بیل ہونگل کے داداقلندر عرف راجے صاب مجاور کو پولیس نے گرفتار کرکے عدالتی حراست میں بھیج دیا ہے جبکہ لاری کا مالک رفیق اور گوڈپّاروپوش ہوگئے ہیں۔پولیس نے لاری سمیت جو جانور ضبط کیے ہیں ان میں گائیں، بھینس، بچھڑے وغیرہ شامل ہیں جن کی مجموعی مالیت 1.60ہزار روپے لگائی گئی ہے۔
رپورٹس کے مطابق چرائے گئے جانوروں کو بہت ہی بے رحمانہ طریقے سے لاری میں ٹھونس کر لے جایا جارہا تھا، البتہ رپورٹس میں اس بات کی جانکاری نہیں دی گئی ہے کہ آیا کسی نے جانوروں کی چوری کی شکایت کسی پولس تھانہ میں درج کی تھی یا نہیں۔
ہوناور کے سرکل انسپکٹر چیلو وا راجواور پی ایس آئی روی کی نگرانی میں اسسٹنٹ سب انسپکٹر گنیش نائک، منی مالن اور دیگر عملے نے اس کارروائی میں حصہ لیا۔
ضبط شدہ جانوروں کو گؤ شالہ میں بھیج دیاگیا ہے اورپولس مفرور ملزمین کی تلاش میں جٹی ہوئی ہے۔