انکولہ میں دو کاروں کی ٹکر؛ دو ہلاک، چار شدید زخمی
انکولہ 24/ جنوری (ایس او نیوز)یہاں انکولہ تعلقہ کے رامن گولی نیشنل ہائی وے 63 پر ہوئی دو کاروں کی ٹکر میں ایک خاتون سمیت دو افراد ہلاک اور چار افراد شدید زخمی ہوگئے ۔ حادثہ بدھ کی دوپہر کو پیش آیا۔
ذرائع سے ملی اطلاع کے مطابق چیورلیٹ کار ہوناور سے دانڈیلی کی طرف جارہی تھی، جبکہ کروزر طوفان کار یلاپور سے ملاّپور کی طرف جارہی تھی، دونوں کاریں رامن گولی ہائی وے پر تیز رفتاری کے ساتھ ٹکراگئیں۔ حادثے میں ہوناور کے کینرا بینک مینجر شری دھر ایل بھٹ (60) اور دوسری کار پر سوار یلاپور کی جیوتی کرن مراٹھی (30) کی موقع پر ہی موت واقع ہوگئی۔
حادثے میں ہلاک ہونے والی جیوتی کے شوہر کرن ٹیکّا مراٹھی (42) ،ان کی آٹھ سالہ بیٹی دِیا اورچھ سالہ بیٹا دیویش سمیت کار ڈرائیور سنتوش ناگپا کیسرکر (30) شدید زخمی ہوگئے ہیں ، جنہیں یلاپور سرکاری اسپتال سےابتدائی طبی امداد کے بعد ہبلی کیمس اسپتال منتقل کیا گیا ہے۔
حادثے میں دونوں سواریوں کو شدید نقصان پہنچا ہے ۔
حادثے کی اطلاع ملتے ہی انکولہ پی ایس آئی شری دھر ایس آر اپنے عملہ کے ساتھ جائے وقوع پر پہنچے اور زخمیوں کو فوری طور پر اسپتال روانہ کرنے کے بعد لاشوں کو پوسٹ مارٹم کے لئے سرکاری اسپتال بھیج دیا۔
انکولہ پولس تھانہ میں معاملہ درج کیا گیا ہے۔
