کاروار، 8 /ستمبر (ایس او نیوز ) اُتر کنڑا ضلع میں گنیش چتورتھی کے موقع پر پُرامن اور ماحول دوست انداز میں تہوار منانے کے لیے انتظامات مکمل کر لیے گئے ہیں۔ ضلع ڈپٹی کمشنر کے لکشمی پریا نے کہا ہے کہ ضلع میں پلاسٹر آف پیرس (پی او پی) سے تیار گنیش کی مورتیوں کی تنصیب اور ڈی جے کے استعمال پر سخت پابندی عائد کی گئی ہے۔
ضلع ڈپٹی کمشنر نے منگل کو اپنے دفتر کے اجلاس ہال میں منعقدہ امن کمیٹی کے اجلاس کی صدارت کرتے ہوئے کہا کہ عوام صرف ماحول دوست گنیش مورتیوں اور پلاسٹک سے پاک سجاوٹی اشیا کا استعمال کریں۔ لاؤڈ اسپیکر کے استعمال کے لیے پولیس کی اجازت لازمی ہوگی، جبکہ ڈی جے کی اجازت نہیں دی جائے گی۔ رہائشی علاقوں میں آواز کی حد 55 ڈیسی بل اور اسکولوں و اسپتالوں جیسے حساس علاقوں میں زیادہ سے زیادہ 50 ڈیسی بل مقرر کی گئی ہے۔ رات 10 بجے کے بعد کسی بھی قسم کے لاؤڈ اسپیکر کے استعمال کی اجازت نہیں ہوگی۔
عوام کو مورتیوں کی تنصیب، جلوس اور لاؤڈ اسپیکر کے لیے مختلف سرکاری دفاتر کے چکر لگانے سے بچانے کے لیے مقامی اداروں اور گرام پنچایت کی سطح پر ’سنگل ونڈو‘ نظام قائم کیا گیا ہے، جہاں متعلقہ محکموں سے ضروری اجازت اور این او سی حاصل کیے جاسکیں گے۔ ضلع بھر میں مجموعی طور پر 1,492 عوامی گنیش مورتیوں کی تنصیب متوقع ہے، جن کے جلوس کے لیے مقامی سطح پر ضروری اجازت حاصل کرنا لازمی ہوگا۔
مورتیوں کے وسرجن کے مقامات پر جے سی بی، فائر بریگیڈ، ہیسکام کے عملہ اور ماہر تیراکوں کو تعینات کیا جائے گا۔ ضلع میں 50 سے زائد مجاز مقامات پر پٹاخوں کی فروخت کا انتظام کیا گیا ہے اور عوام سے اپیل کی گئی ہے کہ وہ صرف مجاز دکانوں سے ’گرین پٹاخے‘ خریدیں۔
ضلع پولیس سپرنٹنڈنٹ دیپن ایم این نے کہا کہ گنیش چتورتھی کو پُرامن اور قانونی دائرے میں منانے کے لیے پولیس کی جانب سے وسیع پیمانے پر حفاظتی اور احتیاطی اقدامات کیے گئے ہیں۔ بھٹکل سب ڈویژن میں 392، کاروار و انکولہ تعلقہ جات میں 131، سرسی سب ڈویژن میں 668 اور ڈانڈیلی، ہلیال و جوئیڈا علاقوں میں 301 عوامی گنیش مورتیوں کی تنصیب ہوگی۔ گزشتہ گنیش تہوار اور جلوسوں کے دوران ہنگامہ آرائی یا بدامنی پیدا کرنے والے افراد کے خلاف بی این ایس کے تحت احتیاطی کارروائی کی رپورٹ درج کرکے سختی سے ’بانڈ اوور‘ کیا گیا ہے۔
پولیس کے مطابق ضلع کی تقریباً 95 فیصد گنیش مورتیوں کا وسرجن 11ویں دن تک مکمل ہوجائے گا۔ سب سے زیادہ وسرجن پانچویں دن 449 اور 11ویں دن 143 ہونے کی توقع ہے۔ اضافی سکیورٹی کے لیے 400 ہوم گارڈز، 15 ڈی اے آر دستے، کے ایس آر پی دستے اور مقامی پولیس اہلکاروں کو ضرورت کے مطابق تعینات کیا جائے گا۔ جلوسوں اور دیگر پروگراموں کے دوران مقررہ صوتی حد کی پابندی یقینی بنائی جائے گی، جبکہ شکایت ملتے ہی پولیس کارروائی کرے گی۔ آلودگی کنٹرول بورڈ کے عملے کے ساتھ پولیس لاؤڈ اسپیکروں کی آواز کی اچانک جانچ بھی کرے گی۔
ہنگامی حالات سے نمٹنے کے لیے فائر بریگیڈ اور طبی عملے پر مشتمل ’کوئک رسپانس ٹیم‘ بھی تہوار کے دوران تیار رہے گی۔ جلوسوں میں ڈی جے کے بجائے مقامی فنکاروں اور ثقافتی ٹیموں کے ذریعے ضلع کی مقامی تہذیب و ثقافت کو اجاگر کرنے والے پروگرام منعقد کرنے کی تجویز دی گئی ہے۔
اجلاس میں گنیش جلوس کے راستوں پر حفاظتی انتظامات بہتر بنانے اور گڑھوں سے بھری سڑکوں کی مرمت کا مطالبہ بھی کیا گیا۔ ڈپٹی کمشنر نے متعلقہ محکموں کو ضرورت کے مطابق عارضی سڑک مرمت کا کام انجام دینے کی ہدایت دینے کا یقین دلایا۔