بھٹکل : کنیاکماری سے لداخ تک تین نوجوانوں کا پیدل سفر : تحفظ ماحولیات ، پانی ، بھوک کے متعلق بیداری پیدا کرنا اہم مقصد
بھٹکل:6؍ اپریل(ایس اؤ نیوز)بین الاقوامی ایرئیل فاؤنڈیشن کی جانب سے ماحولیات کی حفاظت، پانی ،بھوک ، مہاجر وں کے متعلق بیداری پیدا کرنے کا مقصد لے کر تین نوجوا نوں نے کنیاکماری سے لداخ تک پیدل سفر شروع کیاہے۔ یہ تینوں نوجوان پیر کو بھٹکل پہنچے تو ان کا بھٹکل کے عوام نے پھولوں کا ہار پہناتے ہوئے استقبال کیا۔
اس موقع پر فاؤنڈیشن کے ہندوستانی نمائندے احمد قاسم نے اخبارنویسوں سے بات کرتےہوئے کہاکہ یکم مارچ سے ہم تینوں نےکنیا کماری سے یہ پیدل سفر شروع کیا ہے۔ اب تک ہم 900کلومیٹر کا فاصلہ طئے کرچکے ہیں۔ میرے ساتھ شیرشبا اور دنیش قدم بہ قدم ساتھ ہیں۔ اگست کے آخر تک ہم لوگ جئے پور منالی سے ہوتے ہوئے لداخ پہنچیں گے۔ ہمارا یہ پیدل سفر ہندوستان کی13ریاستوں سے گزرے گا۔ ہم لوگ ہردن 30-35کلومیٹر کا فاصلہ طئے کرتےہیں اب ہمارے لئے یہ معمول بن گیا ہے۔ کنور میں شریش نامی نوجوان بھی ہمارے ساتھ شامل ہوئے ہیں وہ زندگی کا لطف اٹھانے کےلئے کنیا کماری سے کشمیر تک کا پیدل سفر کررہےہیں۔ فی الحال وہ ہمارے ساتھ ہیں آگے ان کا راستہ بدل جائے گا۔
بھٹکل میں ان نوجوانوں کا نوفل دامودی، ادریس محتشم اور رمیز کولا نے پھولوں کی مالا پہناتے ہوئے استقبال کیا۔