بھٹکل 29/مارچ (ایس او نیوز) کورونا وائرس کو لے کر دنیا بھر میں جس طرح کا خوف اور دہشت لوگوں کے ذہنوں میں پائی جارہی ہے، بھٹکل بھی اس سے مختلف نہیں ہے، لوگ کسی اور وجہ سے بھی درد سے کراہ سکتے ہیں اور نیچے گر کر درد سے تڑپ سکتے ہیں لیکن اس کا مطلب یہ نہیں ہے کہ وہ کوروناوائرس سے متاثر ہوکر ہی کراہ رہا ہو اور درد سے تڑپ رہا ہو۔

جی ہاں! اسی طرح کی ایک واردات  آج اتوار شام کو بھٹکل کے دوسرے پٹرول پمپ کے قریب،   پیش آئی  جب ایک 14/15سالہ لڑکا سڑک کنارے پیٹ پر ہاتھ رکھ کر اور سینے میں ہاتھ ملتے ہوئے درد سے تڑپنے لگا، وہ لوگوں کو ہاتھوں کے  اشارے سے مدد کے لئے پکار رہا تھا، مگر لوگوں نے جب اسے اس حال میں دیکھا تو  یہ سمجھ لیا کہ یہ کورونا وائرس کا مریض ہے، لوگ  فوراً ادھر سے بھاگنا شروع کردے، لوگوں نے سمجھا کہ لڑکے کو کورونا وائرس کا حملہ ہوا ہے اسی لئے سینے پر ہاتھ پھیرتے ہوئے درد سے تڑپ رہا ہے، سننے میں آیا ہے کہ قریب سے گذرنے والی پولس  بھی اس لڑکے کو اس حال میں دیکھ کر اسے کورونا کا معاملہ سمجھ لیا اور  فورا وہاں سے کسکنے میں ہی بہتری سمجھا، بتایا گیا ہے کہ اس دوران نیشنل ہائی وے پر کچھ دیر کے لئے افراتفری مچ گئی اور پل بھر میں یہ خبر پورے شہر میں پھیل گئی کہ کوئی نوجوان کورونا وائرس کی وجہ سے  پٹرول پمپ کے قریب درد سے تڑپ رہا ہے۔  مگر ایسے موقع پر جو لوگ اس کی مدد کو پہنچے، پورے شہر کے عوام  کو اُن کی داد دینی چاہئے کہ شہر میں ایسے لوگ بھی ہیں جن کی  ہمت اور دلیری کی مثال پورے ملک میں  کم ملے گی۔

  خبر ملی ہے کہ بھٹکل مسلم یوتھ فیڈریشن کے صدر امتیاز اُدیاور اور معروف سماجی کارکن نثار رکن الدین ٹاپ ایسے موقع پر وہاں پہنچے اور   بڑی ہمت اور دلیری کے ساتھ لڑکے کو اُٹھایا اور سیدھے سرکاری اسپتال لے گئے۔

سرکاری اسپتال میں جب لڑکے کی جانچ کی گئی تو پتہ چلا کہ  لڑکے کو کوئی کورونا نہیں تھا بلکہ کچھ ماہ قبل اسے  سانپ نے ڈس لیا تھا جس کی وجہ سے وہ کافی دنوں تک اُڈپی  اسپتال میں ایڈمٹ تھا، اُسی کی وجہ سے پھر ایک بار سانپ کے زہر کے اثر سے وہ لڑکا نیچے گرا تھا اور درد سے تڑپنے لگا تھا۔  لڑکے کی شناخت سمیر کی حیثیت سے کی گئی ہے۔ جس کا  قریب ہی مکان ہے۔ بھٹکل سرکاری اسپتال میں ابتدائی طبی امداد فراہم کرنے کے بعد لڑکے کو اب زائد علاج کے لئے اُڈپی اسپتال شفٹ کیا گیا ہے۔ بتایا جارہا ہے کہ لڑکے کی حالت کافی بہتر ہے۔