منڈگوڈ میں سابق وزیراعلیٰ سدرامیا کا بی جے پی پر زبردست وار، کہا: پہلے بھیڑ بکریوں اور مرغیوں کا بیوپار ہوتاتھا اب ایم ایل اے کا بیوپار ہورہا ہے
منڈگوڈ:26؍نومبر(ایس اؤ نیوز) یلاپور میں ہونے والے ضمنی انتخابات میں کانگریس کی تشہیر کرنےپہنچے کرناٹک کے سابق وزیراعلیٰ سدرامیا نے بی جے پی زبردست وار کرتے ہوئے کہا کہ پہلے مارکیٹ میں بھیڑ بکریوں اور مرغیوں وغیرہ کا کاروبار ہوتاتھا مگر اب ایم ایل اے کا بیوپار ہورہا ہے، بی جے پی نے ارکان اسمبلی کی خرید وفروخت کا نیا بزنس شروع کردیا ہے اور اس آپریشن کمل کے لئے مسٹر یڈیورپا ذمہ دار ہیں۔ سدارامیا نے عوام سے سول کیا کہ کیا آپ کو اس الیکشن کی ضرورت تھی؟ کیا انہیں جمہوریت پر بھروسہ نہیں ہے؟ سدارامیا نے یہ بھی پوچھا کہ موجودہ ضمنی انتخابات کے لئے کون ذمہ دار ہیں؟
پھر خود اپنے سوال کا جواب دیتے ہوئے سدرامیا نے بتایا کہ نااہل ارکان کی وجہ سے ہی یہ سب بوجھ آپ لوگوں پر پڑا ہے اسی لئے نااہل رکن اسمبلی شیورام ہیبار کو باہر کا راستہ دکھائیں اور اُنہیں ہرگز ووٹ نہ دیں۔
اُترکنڑا کے رکن پارلیمان اور مسلمانوں کے خلاف زہر اُگلنے والے آننت کمار ہیگڈے کو نشانہ بناتے ہوئے سدرامیا نے کہا کہ اننت کمار ہیگڈے کی حیثیت گرام پنچایت ممبر ہونے کی بھی نہیں ہے ، مزید کہا کہ ہیگڈے کو دستور ہی معلوم نہیں ہے ، اُسے یہ بھی نہیں پتہ کہ وہ خود کیا بات کررہے ہیں۔ دستور بدلنے والے بیان پر سدرامیا نے کہا کہ اگر میں وزیراعظم ہوتا تو ہیگڈے کو وزارت سے باہر کردیتا۔
عوامی جلسہ سے خطاب کرتے ہوئے سابق ضلع نگراں کار وزیر آر وی دیش پانڈے نے عوام سے معافی مانگتے ہوئے کہاکہ میں نےمنڈگوڈ تعلقہ کے عوام سے 2018کے انتخابات میں شیورام ہیبار کو ووٹ دینے کی اپیل کی تھی جو میری بھول تھی۔ مجھے آپ لوگ اس غلطی پر معاف کریں۔
دیش پانڈے نے کہا کہ جو لیڈر پارٹیاں بدل کر حکومت کو گراتا ہو، اُن کو سبق سکھانا عوام کے لئے ضروری ہے۔ کانگریس امیدوار بھیمنانائک کی حمایت میں تشہیری خطاب کرتےہوئے دیش پانڈے نے کہاکہ سپریم کورٹ نے شیورام ہیبار کو نااہل قرارد یا ہے، لہٰذا عوام کو چاہئے کہ ایسے نا اہل لوگوں کو ووٹ نہ دیں، انہوں نے کہا کہ 5/ دسمبر کو ہونے والے انتخابات میں عوام اگر کانگریس پارٹی کو ووٹ دیتے ہیں ، تو شیورام ہیبار کو اچھا سبق ملے گا ۔ اس موقع پر کئی کانگریسی لیڈران کے علاوہ جے ڈی ایس لیڈرن بھی شامل تھے۔