بھٹکل 28 اگست (ایس او نیوز)  کورونا کو لے کر حکومت جیسے جیسے عوام کو ڈھیل دیتی جا رہی ہے، کورونا کا قہر بڑھتا ہی جارہا ہے، تشویش کی بات یہ ہے کہ ساحلی کرناٹکا  کے تینوں اضلاع اُترکنڑا، اُڈپی اور دکشن کنڑا میں بھی  کورونا کے معاملات میں روز بروز اضافہ دیکھا جارہا ہے  مگر سرکار کی جانب سے لاک ڈاون میں ڈھیل دئے جانے کے بعد سے اکثر عوام نہ کسی طرح کی احتیاطی تدابیر پر عمل کررہے ہیں   اور نہ ہی  سوشیل ڈیسٹنسنگ پر عمل دیکھا جارہا ہے۔ مزید تشویش کی بات یہ ہے کہ کورونا سے مرنے والوں کی تعداد میں بھی روز بروز اضافہ دیکھا جارہا ہے۔

آج جمعہ کو کرناٹک میں  کورونا کے 8960 معاملات ریکارڈ کئے گئے جس میں  پھر ایک بار  بنگلور شہر اول نمبرپر رہا جہاں 2721 معاملات درج کئے گئے۔ مگر دوسری طرفبھٹکل سمیت ساحلی کرناٹکا میں بھی کورونا کا قہر جاری ہے  اور پچھلے چوبیس گھنٹوں میں ضلع  شمالی کینرا میں 148، اُڈپی میں 176 اور جنوبی کینرا میں کورونا کے 448 معاملات سامنے آئے ہیں۔ بھٹکل میں آج بھی ایک شخص کی موت واقع ہوئی جس کی رپورٹ کورونا پوزیٹیو تھی اور اُسے  مینگلور میں ایڈمٹ کیا گیا تھا۔ 

ہیلتھ بلٹین کے مطابق آج  ضلع شمالی کینرا میں کورونا سے  تین لوگوں کی موت ہوئی، اُڈپی میں دو جبکہ ضلع جنوبی کینرا میں  چھ لوگ کورونا کا شکار ہوئے۔

دکشن کنڑا میں آج جو 448 معاملات کورونا کے سامنے آئے ہیں، اُس میں صرف مینگلور شہر سے ہی 273 ہیں،  بنٹوال سے 103، پتور سے 27، سولیا سے 17،  بیلتنگڈی سے 18 جبکہ دیگر علاقوں سے 10 معاملات سامنے آئے ہیں۔ ضلع میں آج چھ لوگوں کی موت کے ساتھ ہی یہاں کورونا سے مرنے والوں کی تعداد بڑھ کر 343 ہوگئی ہے، اُڈپی میں آج دو لوگوں کی موت کے ساتھ مرنے والوں کی تعداد 95 جبکہ اُترکنڑا میں اب مرنے والوں کی تعداد بڑھ کر 51 ہوگئی ہے۔

کورونا کے بڑھتے معاملات اور بھٹکل میں بھی کورونا سے تقریبا ہر روز کسی نہ کسی کی موت کی اطلاع  موصول ہونے پر ایک طرف تعلقہ انتظامیہ عوام الناس سے احتیاطی تدابیر پر عمل کرنے کی درخواست کررہا ہے تو وہیں قومی سماجی ادارہ مجلس اصلاح و تنظیم کی طرف سے بھی  مسجدوں میں اعلانات کئے جارہے ہیں، آج  بھی بعد نماز جمعہ بھٹکل کی جمعہ مساجد میں تنظیم کی طرف سے اعلان نشر کیا گیا جس میں عوام الناس پر زور دیا گیا کہ وہ اپنی صحت کا خیال رکھیں،  کورونا کے علامات ظاہر ہوتے ہی اپنی جانچ کرائیں۔ بھٹکل میں تنظیم کے ساتھ ساتھ  دیگر ادارے بھی کورونا سے لڑنے کے لئے عوام کو ہر طرح کی سہولیات فراہم کرنے میں جُٹے ہوئے ہیں۔ کویڈ کے مریضوں کو قریب سے دیکھنے والے ڈاکٹرس اور ذمہ داران  کا   یہی کہنا ہے  کہ  اگر کسی  شخص کو   اکسیجن میں کمی کی شکایت ہو یا کوئی اور بیماری میں مبتلا ہو تو  اُنہیں اب  خوف میں مبتلا ہونے کی ضرورت نہیں ہے، وہ  فوری بھٹکل میں ہی قائم پرائمری کوویڈ کیئر سینٹر سے رجوع ہوکر اپنا علاج کراسکتا ہے، یاد رہے کہ حکومت نے اب کورونا رپورٹ پوزیٹیو آنے پر لوگوں کو اپنے اپنے  گھروں میں ہی کورنٹائن  رہنے  کی اجازت  دی ہے۔