خواتین بغیر محرم عورتوں کے گروپ کے طور پر حج کر سکتیں ہیں
ریاض ، 7؍جنوری(ایس او نیوز؍ایجنسی)سعودی نائب وزیر حج و عمرہ ڈاکٹر عبد الفتاح مشاط نے کہا ہے کہ اس سال خواتین کیلئے محرم کی شرط نہیں رکھی گئی، خواتین عورتوں کے گروپ کے طور پر مناسک حج ادا کر سکتی ہیں - ڈاکٹر عبد الفتاح مشاط نے الاخباریہ ٹی وی کو بتایا کہ حج کیلئے رجسٹریشن چار پیکیج کے ساتھ جلد شروع ہو رہی ہے-
انہوں نے کہا رجسٹریشن ایک مدت کیلئے ہو گی اور تمام نشستیں ختم ہونے کی صورت میں ختم ہو جائے گی- ان چار پیکیجوں کی قیمت کم از کم3ہزار ریال اور زیادہ سے زیادہ11ہزار ریال ہے- پیکیج اول9214ریال، پیکیج دوم7037ریال، پیکیج سوم11435ریال اور پیکیج چہارم کی قیمت3465ریال ہے-
اس دوران وزارت حج و عمرہ نے امسال اندرون ملک سے عازمین حج کیلئے پیکیجز کا اعلان کر دیا ہے- کم سے کم پیکیج3465ریال کا ہے جس میں واٹ شامل نہیں ہے-وزارت نے کہا ہے کہ اندرون ملک عازمین کیلئے 4پیکیجز متعارف کرائے جارہے ہیں -سب پہلا عوامی پیکیج 3465ریال ہے، دوسرا گیسٹ7037ریال ہے، تیسراجدید خیموں کا9214ریال کا ہے جبکہ چوتھا منی ٹاور میں 11435ریال کا ہے- تمام قیمتوں میں واٹ کا اضافہ کیا جائے گا-وزارت نے کہا ہے کہ تمام پیکیجز اور حج کیلئے ناموں کا اندراج وزارت کے آفیشل پورٹل کے علاوہ نسک ایپ کے ذریعے ہوگا-