مینگلور: بیلتنگدی میں ایک ہفتہ سے لاپتہ نوجوان لڑکی کی نعش برآمد
مینگلور 4 مارچ (ایس او نیوز) یہاں سے قریب 60 کلو میٹر دور بیلتنگڈی میں گذشتہ نو دنوں سے لاپتہ ایک جوان لڑکی کی نعش قریبی جنگل سے برآمد ہوئی ہے جس کے تعلق سے شبہ ظاہر کیا جارہا ہے کہ اُس نے زہر لے کر خودکشی کی ہوگی۔
ذرائع سے ملی اطلاع کے مطابق 23 سالہ جوان خاتون تیجسوینی 22 فروری کو اُجیرے سے لاپتہ ہوئی تھی، بدھ کو جب بعض لوگ جنگل سے لکڑیاں چن رہے تھے تو اُس وقت اس کی نعش جنگل میں دیکھ کر پولس کو خبر دی جو پوری طرح سڑ گل چکی تھی۔
نیریا دیہات کے رہائشی منجوناتھ اور سوشیلا کی بیٹی تیجسوینی اُجیرے کے ایک مکان میں چار سالوں سے نوکری کررہی تھی اور اس درمیان وہ کمپوٹر کی تعلیم بھی حاصل کررہی تھی۔ اُس نے 22 فروری کی شام کو کمپوٹر کلاس کے بعد اپنی ماں کے گھر جانے کی بات کہہ کر گھر سے نکلی تھی، جس کے بعد سے وہ لاپتہ ہوگئی تھی۔
دھرمستھلا پولس نے جائےوقوع پر پہنچ کر نعش کا جائزہ لیا ہے اور نعش کا پوسٹ مارٹم کرنے کے بعد گھر والوں کے حوالے کی ہے۔ پولس معاملے کو لے کر مزید چھان بین کررہی ہے۔
