بھٹکل میں جوان خاتون نے کی خودکشی؛ ریلوے ٹریک پر پائی گئی لاش
بھٹکل 27/جون (ایس او نیوز) تعلقہ کے شرالی چتراپور ریلوے ٹریک پر ایک جوان لڑکی کی لاش برآمد ہوئی ہے جس کے تعلق سے بتایا جارہا ہے کہ اس نے خودکشی کی ہے۔ خودکشی کی وجہ اب تک معلوم نہیں ہوسکی ہے۔
لڑکی کی شناخت شرالی چتراپور کی رہنے والی شوبھا مہادیو نائک (24) کی حیثیت سے کی گئی ہے۔ بتایا گیا ہے کہ اس کی والدہ کا پہلے ہی انتقال ہوچکا ہے اور وہ اپنے والد اور بھائی کے ساتھ رہتی تھی اور شرالی کوٹے باگل میں واقع سینٹ تھامس اسکول میں بچوں کو کمپوٹر سکھاتی تھی ۔ اس کی دو بڑی بہنوں کی شادی ہوچکی ہے ۔
گھروالوں کے مطابق شوبھا رات قریب آٹھ بجے اچانک گھر سے غائب ہوگئی تھی، گھروالوں نے رات بارہ بجے تک اس کو ہر جگہ تلاش کیا اور رشتہ داروں سے بھی فون پر رابطہ کرتے ہوئے اسے تلاش کرنے کی کوشش کی، مگر آج علی الصباح ان کے گھر کے قریب ہی واقع ریلوے ٹریک پر اس کی لاش پائی گئی۔
بتایا گیا ہے کہ رات قریب ایک بجے دہلی سے کیرالہ کی طرف جانے والی منگلا ایکسپریس ٹرین کی زد میں آکر اس کی موت واقع ہوئی۔ ذرائع نے بتایا کہ منگلا ایکسپریس ٹرین کے ڈرائیور نے رات قریب ایک بجے ایک عورت کو ریلوے ٹریک پر چلتے ہوئے دیکھا تھا اور اُس نے عورت کو بچانے کے لئے ٹرین کا ہارن بجاکر اُسے وہاں سے ہٹانے کی کافی کوشش کی مگر وہ ٹریک سے نہیں ہٹی۔
بھٹکل مضافاتی پولس تھانہ میں معاملہ درج کیا گیا ہے اور پولس مزید چھان بین کررہی ہے۔