ولکی جامعہ سیدنا عمر ؓ میں پہلی بار اعلى پیمانے پر ہوا، طلباء جامعہ کے لئے اتھلیٹک مقابلوں کا انعقاد
بھٹکل 12 جنوری (ایس او نیوز) پڑوسی تعلقہ ہوناور کے قصبہ ولکی میں گذشتہ روز اتوارکو ادارةالتعلیم کے زیر اہتمام پہلی بار اعلى پیمانے پر طلباء جامعہ کے لئے اتھلیٹک مقابلوں کا انعقاد ہوا۔ جس میں جامعہ کے طلباء نے مختلف رنگوں کے لباس اور مختلف گروپس میں حصہ لیا۔ طلبا انواع واقسام کے نئے پرانے کھیل کا مظاہرہ پیش کرتے ہوئے حاضرین کی توجہ اپنی طرف مبذول کرانے میں کامیاب رہے۔
سو میٹر، دو سو میٹر او ر تین سو میٹر دوڑ ، بوری کے ساتھ رننگ ، شارٹ پُٹ، لاونگ جمپ، ہائی جمپ، نشانہ بازی، سائیکل بیلنسنگ، بال اِن موتھ جیسے کئی کھیل مقابلوں میں اول، دوم اور سوم آنے والوں کو انعامات سے نوازا گیا۔ اسی طرح گروپ گیمس میں بھی کئی کھیل مقابلے ہوئے اور اول،دوم اور سوم آنے والی ٹیموں کو انعامات سے نوازا گیا۔
جماعت المسلمین کے نائب صدرجناب داولجی محی الدین کی صدارت میں منعقدہ کھیل مقابلوں کی شروعات صبح دس بجے تلاوت کلام پاک سے ہوا۔ جس کے بعد طلباء جامعہ نے کنڑا میں اجتماعی دعا پھر کنڑا نظم پیش کیں۔ دلچسپ بات یہ رہی کہ اجتماعی کھیل مقابلوں کے لئے کبار صحابہ کے نام رکھے گئے تھے۔ مدرسہ کے صدر مدرس مولوی فیض احمد ندوی نے نظامت کی اور آخر میں مختار احمد فخرو نے کلمہ تشکر پیش کیا۔
