بھٹکل 27 مارچ (ایس او نیوز)  آنے والے لوک سبھا انتخابات میں اصل مقابلہ  بی جے پی اور کانگریس کے درمیان  نہیں ہوگا بلکہ  اڈانی اور امبانی جیسے  سرمایہ داروں  کو تعاون فراہم کرنے والوں اور غریبوں کو انصاف دلانے والوں کے درمیان ہوگا، صاف صاف کہیں تو یہ سرمایہ داروں اور غریبوں کے درمیان اور  انصاف اور نا انصافی کے درمیان مقابلہ ہے۔  یہ بات اُترکنڑا کی کانگریسی اُمیدوار انجلی نمبالکر نے کہی۔

کانگریس کی طرف سے انجلی نمبالکر کو اُترکنڑا حلقہ کی اُمیدوار بنائے جانے  کا اعلان ہونے کے بعد  بھٹکل میں اپنی پہلی   آمد کے موقع پر  کانگریسی کارکنان  سے خطاب کرتے ہوئے نمبالکر نے   کہا کہ عوام سے جھوٹے وعدے کرنے ، عوام کو بے وقوف بنانے اور عوام کے ساتھ نا انصافی کرنے   والی بی جے پی کو سبق سکھانا ضروری ہے۔

 نمبالکر نے کہا کہ آپ لوگوں کی  آواز پر میں کام کرنے کے لئے تیار ہوں ۔ کانگریس نے دیش کو آئین دے کر عوام کو خوش حال اور محفوظ رہنے کا موقع دیا ہے ۔ آج  بی جے  پی کا ایک لیڈر امیبڈکر کے بنائے ہوئے دستور کو  تبدیل کرنے کی بات کررہا ہے، ایسی پارٹی کو اقتدار پر آنے سے روکنا ضروری ہے۔

نمبالکر نے کہا کہ  بی جے پی حکومت تمام جھوٹے وعدوں کے سہارے دس سال گزارتے آئی ہے ۔ گزشتہ دس سال میں کوئی بھی وعدہ پورا نہیں کیا گیا ۔  ایئر کنڈیشنڈ روم میں بیٹھ کر 'من کی بات' کرنے والے وزیراعظم نے  سرمایہ داروں کے کروڑوں  کے قرض کو معاف کیا ہے، مگر غریب کسانوں کے قرض کو معاف کرنے تیار نہیں ہے، ایسی  عوام کو دھوکہ دینے والی بی جے پی کو سبق سکھانا ضروری ہے اور دیش کے تحفظ اور عوام کو انصاف دلانے کے لئے کانگریس پارٹی الیکشن لڑ رہی ہے ۔

نمبالکر نے کانگریسی کارکنان سے کہا کہ آپ گھر گھر جاکر  صرف  ہماری کرناٹک  سرکار کی طرف سے جاری کی گئی پانچ گارنٹیوں کے بارے میں عوام کے اندر بیداری پیدا کریں،  صرف اتنا کرنا ہی کانگریس کی جیت کے لئے کافی ہوگا۔ نمبالکر نے کہا کہ پندرہ پندرہ لاکھ  عوام کے اکاونٹ میں جمع کرانے کا وعدہ کرنے والی  پارٹی نے عوام کے بینک اکاونٹ کو ہی خالی کردیا ہے، مہنگائی کم کرنے  کے نام پر عوام سے ووٹ حاصل کرنے والی پارٹی نے  عوام کو اتنا بڑا دھوکہ دیا ہے کہ  مہنگائی ساتویں آسمان پر پہنچ چکی ہیں، ہر سال دو کروڑ لوگوں کو روزگار فراہم کرنے کا وعدہ کرنے والی پارٹی  نے  کسی  ایک  کو بھی روزگار  نہیں دیا ہے۔
    
کے پی سی سی ڈسپلن کمیٹی کے کنوینر نویدیت آلوا نے کہا کہ گزشتہ دس برسوں  سے بی جے پی کے وعدے پورے نہیں ہوئے ۔ جو حالات بنے ہیں اس پر دھیان دیں ۔ انجلی نمبالکر اس حلقے کے لئے ضروری ترقیاتی کاموں کی واقفیت رکھتی ہے ۔ انتخابی تشہیر کے لئے پارٹی نے 30 دن کی مہلت دی ہے ۔ ہمارے امیدوار کو جیت دلانے کی ذمہ داری ہماری ہے ۔ 
    
اس سے قبل ضلع انچارج وزیر منکال وئیدیا نے  خطاب کرتے ہوئے  کانگریسی کارکنان سے اپیل کی کہ کانگریس کی اس امیدوار کو جیت ددلانے کے لئے   کام کریں۔ کانگریس ضلع صدر سائی گاونکر نے کہا کہ انتخابی تیاری کے لئے ہمیں کیا کچھ کرنا ہے اس سلسلے میں ضلع انچارج وزیر اور سینئر لیڈر رہنمائی کریں گے ۔ ہماری امیدوار ڈاکٹر انجلی نے طبی میدان میں خدمات انجام دی ہیں ۔ عوامی خدمات انجام دینے کا جذبہ رکھتی ہیں ۔ یہ ہماری خوش قسمتی ہے کہ خانہ پور سے تعلق رکھنے والی نمبالکر اس حلقے کی امیدوار بنی ہیں ۔