لکھنو 4؍دسمبر(ایس او نیوز؍یو این آئی) اترپردیش کی یوگی حکومت نے لو جہاد پر قابو پانے کے نام پر 14 لوگوں کے خلاف معاملہ درج کرلیا ہے۔ میڈیا سے ملی اطلاعات کے مطابق  اُترپردیش کے ضلع مئو میں دو مختلف مذاہب سے تعلق رکھنے والے عاشق جوڑے کے گھر سے بھاگ جانے کے بعد مبینہ لوجہاد پر کنٹرول کے دعوی کے ساتھ تبدیلی مذہب قانون کے تحت 14افرادکے خلاف معاملہ  درج کیا گیا ہے۔افسران کا کہنا ہے کہ  لڑکا پہلے سے شادی شدہ ہے۔

ایڈیشنل سپرنٹنڈنٹ آف پولس تربھون ناتھ ترپاٹھی نے جمعہ کو بتایا کہ ’’چریا کوٹ پولس اسٹیشن کے مولنا گنج گاؤں میں دو مختلف مذاہب سے تعلق رکھنے والے لڑکی اور لڑکا اپنے گھر سے فرار ہوگئے۔لڑکا پہلے سے شادی شدہ ہے۔ اس ضمن میں پولس نے تبدیلی مذہب قانون ایکٹ کے دفعات 366، 506 اور 3/5 کے تحت مقدمہ درج کر کے معاملے میں کارروائی شرو ع کردی ہے۔

الزام ہے کہ پہلے سے شادی شدہ لڑکے نے دوسرے مذہب سے تعلق رکھنے والی لڑکی کو 30نومبر کو اس کی متوقع شادی سے قبل بہلا پھسلا کر اپنے ساتھ بھگا لے گیا۔اہل خانہ کو جیسے ہی اس کا پتہ چلا، انہوں نے اس کی اطلاع پولس کو دی۔لڑکی کے والد کی جانب سے تحریر دئیے جانے پر پولس نے اس ضمن میں ایف آئی آر درج کی ہے۔ جوڑے کا ابھی تک کوئی سراغ نہیں لگ سکا ہے۔ پولس انہیں تلاش کررہی ہے۔