امریکا اور سعودی عرب کے عسکری تعلقات میں پیش رفت ہو رہی ہے: پینٹاگان
ریاض، 2مارچ (آئی این ایس انڈیا)امریکی وزارت دفاع پینٹاگان نے باور کرایا ہے کہ امریکا سعودی عرب کی ایک تزویراتی اتحادی کی حیثیت سے اس کی مدد اور حمایت جاری رکھے گا۔ وزارت دفاع کا کہنا ہے کہ امریکا اور سعودی عرب کے باہمی تعلقات میں تیزی کےساتھ پیش رفت ہو رہی ہے۔
پینٹاگان کے ترجمان جان کیربی نے صحافیوں سے بات کرتے ہوئے کہا کہ سعودی عرب کو اپنے دفاع کا حق حاصل ہے۔ ہم بھی سعودی عرب کے دفاع کے حوالے سے پانی ذمہ داریاں پوری کریں گے۔
ایک دوسرے سیاق میں امریکی محکمہ دفاع نے گذشتہ ہفتے شام میں ایرانی حمایت یافتہ ایک ملیشیا پر حملے کی تصدیق کی اور کہا کہ اس کارروائی کے نتیجے میں ایک ایران نواز جنگجو ہلاک اور دو زخمی ہوئے ہیں۔
ترجمان نے مزید کہا کہ ہم شام میں صورت حال پر نظر رکھے ہوئے ہیں کسی بھی صورت حال کی تبدیلی کے حوالے سے ہم فوری معلومات فراہم کریں گے۔
امریکا نے سعودی عرب پر یمن کے حوثی باغیوں کی طرف سے کیے جانے والے حملوں کی مذمت کی اور مملکت کو اپنا تزویراتی اتحای قرار دیتے ہوئے سعودی عرب کے دفاع میں الریاض کا ساتھ دینے کے عزم کا اظہار کیا ہے۔
اتوار کو امریکی وزارت خارجہ کی طرف سے جاری ہونے والے ایک بیان میں کہا گیا ہے کہ حوثی باغیوںکےحملے نہ صرف شہریوں کے لیے خطرہ ہیں بلکہ یہ یمن میں امن واستحکام کے لیے بھی ایک بڑا مسئلہ ہیں۔
