بھٹکل میں ایک شخص کی نعش درخت سے لٹکتی ہوئی پائی گئی، خودکشی کا شبہ
بھٹکل 3/ مارچ (ایس او نیوز) تعلقہ کے آسارکیری میں ایک 50 سالہ شخص کی نعش ایک درخت سے لٹکتی ہوئی پائی گئی، جس کے تعلق سے شبہ ہے کہ اُس نے پھانسی دے کر خودکشی کی ہے، متعلقہ شخص کی شناخت وجئے پورا کے رہائشی ملی اپّا کی حیثیت سے کی گئی ہے۔ واردات اتوار کی دوپہر کو سامنے آئی۔
پتہ چلا ہے کہ یہ ذہنی مریض تھا، صبح قریب 10:30 بجے اس نے ایک دکان میں جاکرموبائل سم کے تعلق سے بات چیت کی تھی، مگر دوپہر ہوتے ہوتے اُس کی نعش ایک درخت سے لٹکتی ہوئی پائی گئی۔
دیکھا گیا ہے کہ آسارکیری میں ایک پرائیویٹ ملکیت والی جگہ پر واقع درخت سے لنگی کی مدد سے پھانسی پر لٹکا ہوا تھا۔
پھانسی پر لٹکتے دیکھ کر مقامی لوگوں نے فوری پولس کو خبر کی، اور پولس نے نعش کو بھٹکل سرکاری اسپتال کے مردہ خانے میں منتقل کیا۔
پولس نے بتایا کہ وجئے پورا میں رہنے والے اس کے گھروالوں کو خبر کی گئی ہے۔
ٹاون پولس تھانہ میں معاملہ درج کیا گیا ہے۔
