منگلورو 6 / جنوری (ایس او نیوز) منگلورو کے ایک شادی ہال سے دلھن کو چھوڑ کر دولھا اس وقت فرار ہوگیا جب عین شادی کی تقریب کے دوران  اس کی معشوقہ پولیس کے ساتھ موقع پر پہنچ گئی ۔

    بتایاگیا ہے کہ کوزی کوڈ کیرالہ کا ایک لڑکا منگلورو کی لڑکی سے شادی رچا رہا تھا ۔ پنڈت نے شادی کی رسومات انجام دی تھیں اور دولھے نے دولھن کے گلے میں منگل سوتر پہنایا ہی تھا کہ اچانک میسورو کی ایک نوجوان لڑکی پولیس کے ساتھ شادی ہال میں پہنچ گئی اور دولھے پر الزام لگایا کہ اس شخص نے شادی کا وعدہ کرتے ہوئے اس کے ساتھ جسمانی تعلقات بنائے تھے اور اب اسے چھوڑ کر وہ نئی لڑکی کے ساتھ شادی رچا رہا ہے ۔ 

اطلاع کے مطابق اس لڑکی نے کیرالہ پولیس تھانہ میں  لڑکے کے خلاف عصمت دری کی  شکایت درج کروائی تھی جس کے بعد لڑکے نے کیرالہ کی عدالت میں  قبل از وقت گرفتاری سے بچنے کے لئے ضمانت  کی درخواست دی تھی جو مسترد ہوگئی  ۔ اس کے بعد لڑکے نے بڑی عجلت میں منگلورو کی لڑکی سے شادی کا پروگرام بنایا  مگر عین شادی کے وقت  کیرالہ پولیس کے ساتھ اپنی معشوقہ کی آمد کی بھنک ملتے ہی دلھن کو شادی ہال میں چھوڑ کر دولھا موقع پر سے فرار ہوگیا اور دلھن کے گھر والے منھ دیکھتے رہ گئے ۔

پتہ چلا ہے کہ لڑکا موقع پر سے فرار ہونے کےبعد پولس سے رابطہ کیا ہے۔  پولیس اس معاملے کی چھان بین کر رہی ہے ۔