اڈپی 6 / اکتوبر (ایس او نیوز) ریلوے پولیس کے اہلکاروں نے اڈپی اسٹیشن پر نیتراوتی ایکسپریس ٹرین پر سفر کرنے والی خاتون مسافر کو لوٹنے والے چور کو واردات کے بعد چار گھنٹے کے اندر ہی دبوچ لیا اور اس کے قبضے سے 6.75 لاکھ روپے مالیت کے زیورات برآمد کیے ۔

  گرفتار شدہ ملزم کا نام سنی ملہوترا (30 سال) ہے جو دہلی کا رہنے والا ہے ۔ بتایا جاتا ہے نیتراوتی ایکسپریس کی بوگی نمبر S-7 میں سفر کرنے والی کلیانی بالاکرشنا نے ریلوے پولیس کے پاس سفر کے دوران اپنے زیورات سمیت نقدی اور کارڈ جیسی قیمتی اشیاء والی بیگ چوری ہونے کی شکایت درج کروائی تھی ۔ 

 ریلوے پولیس اہلکار سری کانت نے اڈپی ریلوے اسٹیشن پر نگرانی شروع کی تو اسے منگلورو جانے والی سمت کے پلیٹ فارم ایک شخص مشتبہ حالت میں بیٹھا ہوا محسوس ہوا ۔ اس سے پوچھ تاچھ کرنے پر اس نے اپنے پاس موجود منگلورو - مڈگاوں کا ریلوے ٹکٹ دکھایا جو 4 اکتوبر کے لئے تھا ۔ تفتیش کے دوران اس شخص نے اچانک ایک اے ٹی ایم کارڈ پلیٹ فارم کےکنارے پر موجود جھاڑیوں میں پھینک دیا جسے سری کانت اٹھا لیا اور اس سے اس بارے میں پوچھا تو اس نے کوئی واضح جواب نہیں دیا ۔ 

 ریلوے پولیس کے اے ایس آئی سدھیر چودھری اور دیگر عملہ نے اس شخص سے مزید تفتیش کی تو سنی ملہوترا نامی اس شخص نے ٹھوکور اسٹیشن پر نیتراوتی ایکسپریس کی بوگی نمبر S-7 میں چوری کی واردات انجام دینے کا جرم قبول کر لیا ۔ 

 سنی ملہوترا نے ریلوے پولیس کو بتایا کہ ٹھوکور اسٹیشن سے قریب چوری کی واردات انجام دینے کے بعد ٹرین کی رفتار دھیمی ہوتے ہی وہ بیگ کے ساتھ باہر کود گیا ۔ پھر اس بیگ سے سامان نکالنے کے بعد اس نے بیگ کو ریلوے ٹریک کے کنارے پر موجود جھاڑیوں میں پھینک دیا ۔ اس کے بعد ٹھوکر اسٹیشن سے وہ تیرونیلویلی - دادر ٹرین پر چڑھا اور واپس اڈپی اسٹیشن پر آ کر اتر گیا ۔ 

 ملزم سنی ملہوترا سے تفتیش کے دوران اس کے پاس سے 6,75,000 روپے مالیت کے 93.17 گرام وزنی چار گولڈ چین ، 3.700 روپے نقد اور ایک اے ٹی ایم کارڈ برآمد ہوئے ۔ 

 مزید قانونی کارروائی کے لئے ملزم کو ضبط شدہ مسروقہ مال سمیت منی پال پولیس کے حوالے کیا گیا ۔