اُڈپی:28؍ستمبر(ایس اؤ نیوز)ضلع کی ہمہ گیر ترقی کے لئے میسر وسائل کا بہتر استعمال کرنے اور سبھی متحد ہوکر ترقی کی طرف آگے بڑھنے کی ریاستی وزیر داخلہ اور ضلع نگراں کار وزیر بسوراج بومائی نے اُڈپی ضلع افسران و عملے سے اپیل کی۔ وہ یہاں جمعہ کو اُڈپی کے ضلع پنچایت ہال میں منعقدہ ضلع ترقی معائنہ میٹنگ میں بات کررہے تھے۔

انہوں نے کہاکہ ضلع کی سیاحت کو ایک نیا رخ دیتے ہوئے سیاحت کو ترقی دینے کے لئے اُڈپی ضلع ٹورزم ٹاسک فورس کی تشکیل دینے کا فیصلہ لیاگیا ہے۔ ٹاسک فورس میں سیاحت کے ماہرین، صنعت کار، سرمایہ دار ، افسران ، مقامی ماہرین شامل ہونگے ۔ اس سلسلے میں ضلع کے سبھی تعلقہ جات کے سیاحتی مراکز کی ٹورزم وژن ڈاکومینٹری تیار کی جائے گی۔ انہوں نے افسران سے کہاکہ آدھار کارڈ تقسیم کاری کو بہتر بنانے کی سمت میں قدم اٹھائیں اور متحرک ہوکر کام کریں۔ گھروں کی تعمیر کے لئے رقم منظورنہیں ہونے کی وجہ کے متعلق رپورٹ تیارکرکے سونپیں، افسران اپنے اپنے دائرے میں رہتے ہوئے ذمہ داری سے کام انجام دینے کی بات کہی۔ انہوں نے افسران کو پُر اعتماد رہتے ہوئے کام کرنے کو کہا اور عوامی خدمات کو انجام دینے میں کوئی قانونی مسئلہ درپیش ہوتو افسران کی حمایت کرنے اور انہیں تحفظ دینے کی بات کہی۔ میٹنگ میں ضلع پنچایت صدر دینکر بابو، اُڈپی کے رکن اسمبلی رگھوپتی بھٹ، کنداپور کے رکن اسمبلی ہالاڑی شری نواس شٹی ، کارکلا کے وی سنیل کمار، کاپو کے لال جی مینڈن ، بیندور کے بی ایم سکمارشٹی ، ضلع ڈپٹی کمشنر جگدیش ، ایس پی نیشا جیمس، سی ای اؤ پریتی گہلوت وغیرہ موجود تھے۔