اڈپی ضلع میں کل 9اگست کوبھی تعلیمی اداروں میں چھٹی کا اعلان۔ جنوبی کینرا میں تعلیمی ادارے کھلے رہیں گے
اڈپی 8/اگست (ایس او نیوز) اڈپی ضلع کی ڈپٹی کمشنر ہیپسبا رانی کورلاپتی نے موسلادھار بارش کے پس منظر میں تعلیمی اداروں کو گزشتہ دو دنوں سے دی گئی چھٹی میں مزید توسیع کرتے ہوئے 9اگست کے لئے بھی چھٹی کا اعلان کردیا ہے۔
محکمہ موسمیات نے پیش گوئی کی ہے کہ گزشتہ چند دنوں سے جاری بھاری برسات مزید 48گھنٹوں تک جاری رہ سکتی ہے۔اسی بات کو سامنے رکھتے ہوئے ڈی سی نے مزید ایک دن کے لئے چھٹی کو بڑھا دیا ہے۔
دوسر ی طرف جنوبی کینرا کے ڈپٹی کمشنر سسی کانت سینتھل نے اعلان کیا ہے ضلع میں دو دن کی چھٹیوں کے بعد9اگست کو تمام اسکول اور کالج پوری طرح کھل جائیں گے اور حسب معمول تعلیمی سرگرمیاں جاری رہیں گی۔ڈی سی نے مزید وضاحت کرتے ہوئے کہا کہ سوشیل میڈیا پر جنوبی کینرا میں 9اگست کوچھٹی کا جو مسیج آرہا ہے وہ جھوٹا اور گمراہ کن ہے۔ ضلع انتظامیہ کی طرف سے چھٹی کا اعلان نہیں کیا گیا ہے۔چند شرپسند عناصر ڈی سی کے آرڈر میں تاریخ بدل کر گمراہ کرنے والا مسیج نشر کررہے ہیں۔اس لئے عوام سے ان افواہوں پر دھیان نہ دینے کی درخواست کی گئی ہے۔اس کے علاوہ ڈی سی نے عوام کو الجھن میں ڈالنے والی اس قسم کی شرارت کرنے والوں کے خلاف کڑی کارروائی کرنے کی بھی تنبیہ دی ہے۔