دبئی : یو اے ای نے کیا کووڈ سے متعلق تمام پابندیاں ختم کرنے کا اعلان
دبئی ،7 ؍ نومبر (ایس او نیوز) متحدہ عرب امارات نے تقریباً ڈھائی سال سے جاری کووڈ سے متعلق تمام قوانین اور پابندیاں اٹھا لینے کا اعلان کیا ہے ۔
شعبہ صحت کے افسران نے بتایا کہ عبادت گاہوں سمیت دیگر تمام کھلی اور بند جگہوں پر ماسک پہننا یا نہ پہننا انفرادی طور پر اختیاری (آپشنل) بات ہوگی ۔ البتہ طبی مراکز اور معذورین کے مراکز میں ماسک پہننا لازمی ہوگا ۔ مسجدوں میں نماز کے لئے اپنے ذاتی مصلے استعمال کرنا اختیاری بات ہوگی ۔
پابندیوں اور قوانین میں نرمی کے دوسرے مرحلہ کی تفصیلات بتاتے ہوئے نیشنل ایمرجنسی کرائسیس اینڈ ڈیسیاسٹر منیجمنٹ اتھاریٹی نے کہا ہے کہ کووڈ پوزیٹیو نکلنے کی صورت میں متاثرہ شخص کے لئے پانچ دن کے لئے آئسولیشن میں رہنے کی پابندی برقرار رہے گی ۔ اس کے علاوہ کووڈ 19 کی پی سی آر جانچ ، کووڈ کی صورتحال کی نگرانی اور طبی سہولت فراہم کرنے کا سلسلہ برقرار رہے گا ۔
