پولیس انسپکٹروں کے تبادلے ۔ دیواکر کو بھٹکل ٹاون میں انسپکٹر کی ذمہ داری؛ مہابلیشور نائک بنے بھٹکل مضافاتی تھانوں کے سرکل انسپکٹر
بھٹکل 9؍اکتوبر (ایس او نیوز) ریاستی حکومت نے کُل 73 پولیس انسپکٹروں کے تبادلے اور عہدوں میں تبدیلی کے احکامات جاری کیے ہیں جس میں ضلع اُترکنڑا کے تھانوں کے پولس اہلکار بھی شامل ہیں۔
ذرائع سے ملی اطلاع کے مطابق بھٹکل سرکل پولیس انسپکٹر کی خدمات انجام دے رہے دیواکر پی ایم کا عہدہ تبدیل کرکے انہیں ترقی دی گئی ہے اور انہیں اب ٹاون پولیس اسٹیشن میں انسپکٹر کا درجہ دیا گیا ہے ۔
بھٹکل مضافاتی پولس تھانہ (جالی روڈ)، مرڈیشور مضافاتی پولس تھانہ اور منکی مضافاتی تھانہ کو چھ ماہ قبل آپ گریڈ کیا گیا تھا اور یہاں کسی سرکل پولس انسپکٹر کی تقرری نہیں کی گئی تھی، اب اِن تین تھانوں کے لئے سرکل پولس انسپکٹر کے طور پر مہابلیشور نائک کا تقرر کیا گیا ہے۔ مہابلیشور نائک ضلع اُترکنڑا میں انٹرنل سیکوریٹی ڈپارٹمنٹ میں خدمات انجام دے رہے تھے، اب اُنہیں بھٹکل کے تین تھانوں کی ذمہ داری سونپی گئی ہے۔
اسی طرح کوسٹ گارڈ پولیس سے وابستہ وسنت رامچارکا تبادلہ کرتے ہوئے اُنہیں مضافاتی گوکرن پولیس اسٹیشن میں تعینات کیا گیا ہے ۔ جبکہ ڈانڈیلی سرکل پولیس انسپکٹر پربھو آر گنگن ہلّی کو بنگلورو نگر سی سی بی میں تبادلہ کیا گیا ہے۔
ڈسٹرکٹ اسپیشل برانچ میں اپنی تعیناتی کے لئے مقام کا انتظار کررہے مہیندرا کمار کو کرناٹکا لوک آیوکتہ میں ذمہ داری سونپی گئی ہے اسی طرح بیلگاوی کاکتی پولیس اسٹیشن کے راگھویندرا ہلّور کو ضلع شمالی کینرا مہیلا پولیس اسٹیشن میں ڈیوٹی دی گئی ہے، پرانی ہبلی پولیس اسٹیشن کے شیوپّا ایس کمتگی کو ضلع شمالی کینرا ڈسٹرکٹ اسپیشل برانچ میں ٹرانسفر کیا گیا ہے ۔
معلوم ہوا ہے کہ سرکاری حکمنامہ متعلقہ انسپکٹروں کو کسی بھی تاخیر کے بغیر فوراً تبادلہ کیے گئے مقامات پر پہنچ کر چارج لینے کی ہدایت دی گئی ہے ۔
