بھٹکل 15/جولائی (ایس او نیوز)  کرناٹکا کے پسماندہ ذات اور پسماندہ طبقات ملازمین کے متحدہ محاذ اترکنڑا شاخ کی طرف سے کاروار شہر کے ضلع رنگ مندر میں   ایس ایس ایل سی اور پی یوسی میں ٹاپ کرنے والے ضلع اُترکنڑا  کے اسٹوڈینٹس  کی شال پوشی کے ساتھ   تہنیت کی گئی اور اُنہیں بیسٹ اسٹوڈینٹس کے اعزاز سے نوازا گیا۔

 بیسٹ اسٹوڈینٹ کا اعزاز حاصل کرنے والی  بھٹکل کی طالبات میں   ہُمنا بنت ڈاکٹر سمیع اللہ  اور   نُسینہ بنت الطاف کوبٹے  شامل ہیں جنہوں نے نہ صرف تعلقہ بھر میں بلکہ ضلع اُترکنڑا میں  بالترتیب اول اور دوم مقام حاصل کرنے میں کامیاب ہوئی تھیں۔ یہ دونوں  انجمن  کی طالبات ہیں۔ انہیں اعزاز کے ساتھ ساتھ سرٹی فیکٹ اور میمنٹو  بھی دئے گئے۔

پروگرام کی صدارت کرتے ہوئے  محاذ کے صدر منوج نے بتایا کہ  ضلع بھر کے سب سے ٹاپ پچاس اسٹوڈینٹس کو  ہر سال  خصوصی اعزاز سے نوازا جاتا ہے جس میں ایس ایل سی، پی یوسی شعبہ آرٹس، شعبہ کامرس اور شعبہ سائنس کے اسٹوڈینٹس  شامل ہوتے ہیں۔ انہوں نے کہا کہ  ابتدا میں ہم پسماندہ  و پچھڑے طبقے کے  طلبا و طالبات کی تہنیت کرتے تھے، مگر اب  دیگر طبقات کے اسٹوڈینٹس کی بھی تہنیت کرتے ہیں۔ انہوں نے ضلع کے مختلف تعلقہ جات سے تشریف فرما تمام ہونہار  اسٹوڈینٹس  کو مبارکباد پیش کرتے ہوئے انہیں تعلیم کے میدان میں مزید آگے بڑھنے اور  ملک و قوم کی تعمیر و ترقی میں اہم رول ادا کرنے کی  اپیل کی ۔

محکمہ بندرگاہ کے ڈائرکٹر کیپٹن  سوامی نے امبیڈکر کی تصویر کو پھول مالا پہناتے ہوئے پروگرام کا افتتاح کیا۔  پروگرام میں ڈی ڈی پی یو ،ایم جی پول۔ میونسپل کارپوریشن کے معاون انجنئیر موہن راج ، اے سی ایف منجوناتھ ناوی  سمیت کئی  ذمہ داران  موجود   تھے۔

آر وی دیش پانڈے میموریل ٹرسٹ کی طرف سے بھی تہنیت:   نُسینہ بنت الطاف کوبٹے نے بتایا کہ   ضلع بھر میں دوسرا رینک حاصل کرنے پر اُنہیں  آر وی دیش پانڈے میموریل ٹرسٹ کی جانب سے بھی  ہلیال آنے کی دعوت دی گئی تھی، مگر وہ  وہاں شریک نہیں ہوسکی،ا لبتہ  ٹرسٹ کی جانب سے انہیں  بیسٹ اسٹوڈینٹ کی سرٹی فیکٹ اور میمنٹو  ارسال کیا گیا ساتھ ہی   دیشپانڈے ٹرسٹ کی جانب سے  ہمت آفزائی کے طور پر ایک  چیک بھی پیش کیا گیا اور اُنہیں مبارکباد  دی گئی۔