دبئی، 12/فروری (ایس او نیوز/ایجنسی) متحدہ عرب امارات (یو اے ای) کے سات میں سے چھ ریاستوں ابوظبی، دبئی، شارجہ، فُجیرہ، عجمان اور راس الخیمہ میں پیر کو گرج چمک کے ساتھ موسلا دھار بارش ہوئی جس کے نتیجے میں ایک طرف متعدد سڑکوں پر پانی جمع ہوگیاوہیں موسم بھی خوشگوار ہوگیا۔
میڈیا رپورٹ کے مطابق اماراتی محکمہ موسمیات نے خراب موسم کا الرٹ جاری کرتے ہوئے مزید بارشوں کا الرٹ جاری کردیا ہے۔
شدید بارشوں کے پیش نظر دبئی اور شارجہ کے تعلیمی اداروں میں پیر کے دن تعطیل کا اعلان کردیا گیا، سرکاری و نجی کمپنیوں کے ملازمین کو گھروں سے کام کرنے کا حکم جاری کیا گیا جبکہ حکام کی جانب سے شہریوں کو غیر ضروری سفر کرنے سے منع کیا گیا ہے۔
دوسری جانب گزشتہ روز سعودی عرب کے شہر عسیر اور جازان کے بالائی علاقوں میں بھی ہلکی بارش ہونے کی اطلاع ملی ہے، جس کے باعث وہاں پر بھی موسم خوشگوار ہوگیاہے۔
سعودی محکمہ موسمیات کا اس حوالے سے کہنا ہے کہ اسمان آبرآلود رہے گا جس کی وجہ سے درجہ حرارت میں نمایاں کمی واقع ہوسکتی ہے۔
دبئی پولیس نے جاری کیا'الرٹ':
دبئی پولیس نے عوامی تحفظ کے لیے خصوصی 'الرٹس' جاری کیے ہیں۔ یہ 'سیفٹی الرٹس' آج پیر کے روز کی طوفانی بارشوں کی پیش گوئی کے سلسلے میں جاری کیے گئے ہیں۔ موسمیاتی مرکز کی پیش گوئی میں بتایا گیا ہے کہ پیر کادن دبئی اور اس کے طول و عرض مین بد ترین طوفانی بارش کا دن ہے۔
اس لیے شہریوں کو اپنے تحفظ کے لیے خصوصی احتیاط کی ہدایات جاری کی گئی ہیں۔ کیونکہ یہ طوفانی بارش پورے متحدہ امارات میں ہو گی۔ اسی کے پیش نظر دو روز قبل امارات کے سرکاری ملازمین کے لیے حکم جاری کیا گیا تھا کہ وہ گھر سے اپنے سرکاری اور دفتری امور کی انجام دہی کریں گے۔
تازہ الرٹس میں پولیس نے کہا ہے کہ امارات میں موسمی تغیر کا امکان ہے۔ شہریوں سے کہا گیا ہے کہ طوفانی موسم میں ساحلوں سے دور رہیں۔ ندیوں کے بہاؤ کے راستوں سے دور رہیں۔ گاڑیوں میں سفر کرنے والوں کو ہدایت کی گئی ہے کہ وہ بھی محتاط رہیں اور حکام کی مسلسل ملنے والی ہدایات کی پیروی کریں۔
امارات کے مرکز برائے موسمیات نے اس سلسلے میں پیلے اور نارنجی رنگ کے الرٹس کی نشاندہی کی ہے۔ پیلے رنگ کا مطلب احتیاط کرنے کی ضرورت، جبکہ نارنجی رنگ کا مطلب مقابلتا زیاہ احتیاط برتنے کی ضرورت ہے۔ اب پولس نے نارنجی کا الرٹ راس الخیمہ، شارجہ، ام القوئن اور دبئی کے لیے جاری کئے گئے ہیں۔