بھٹکل 15/ڈسمبر (ایس او نیوز) ہاسن سے سیر و تفریح کے لئے پہنچے تین سیاحوں کو لائف گارڈ کے اراکین نے اُس وقت بچالیا، جب وہ مرڈیشور کے بحرعرب  سمندر میں تیرنے کے دوران غوطے کھاتے ہوئے غرق ہونے کے قریب تھے۔

ذرائع سے ملی اطلاع کے مطابق  تینوں دوست اپنے دیگر چار دوستوں کے ساتھ تین دن کے سیاحتی دورہ پر بھٹکل پہنچے تھے اور مرڈیشور سمندر میں تیررہے تھے کہ اچانک   ایک بڑی موج تینوں کو اپنے ساتھ بہالے گئی، تینوں  گہرے پانی میں پہنچ کر غوطے کھانے لگے اور مدد کے لئے پکارنے لگے، ساحل پر موجود لائف گارڈ کے اہلکاروں کی جب ان پر نظر پڑی تو  فوری ان کی مدد کو پہنچ گئے اور تینوں کو بحفاظت کنارے تک لانے میں کامیاب ہوگئے۔تینوں کی شناخت  پرجول سریش (17)، پرجول شیونا (16) اور  اُلاس شری نواس (16) کی حیثیت سے کی گئی ہے۔ اس میں سے ایک پی یوسی اور دیگر دو میٹرک کے طالب العلم ہیں۔ تینوں کا تعلق ضلع ہاسن کے  ہوسکوٹا ہالور سے ہے۔ یہ لوگ جمعرات کو ہاسن سے سیاحت کے لئے نکلے تھے جگکہ  جمعہ شام  کو مرڈیشور سمندر میں تیرنے کے دوران یہ واردات پیش آئی۔

لائف گارڈ کے اہلکار شیکھر دیواڑیگا اور ششی دھر نائک نے بتایا کہ تینوں گہرے سمندر میں چلے گئے تھے، مگر بھگوان کا شکر ہے کہ ہم انہیں بچالانے میں کامیاب ہوگئے۔

تینوں کو مرڈیشور پولس کے حوالے کیا گیا اور پولس نے  ضروری ہدایات اور وارننگ کے بعد کہ وہ دوبارہ مرڈیشور سمندر میں تیرنے کے لئے نہیں اُتریں گے، گھر جانے کی اجازت دی۔