گدگ میں معروف کنڑا اداکار ایش کا کٹ آوٹ لگاتے وقت بجلی کا شاک لگنے سے 3 نوجوان ہلاک - 3 شدید زخمی - حکومت کی طرف سے معاوضہ کا اعلان
گدگ 9 / جنوری (ایس او نیوز) کنڑا فلم اداکار ایش کے برتھ ڈے پر ایک بہت بڑا کٹ آوٹ آویزاں کرنے کے موقع پر حادثاتی طور پر بجلی کا شاک لگنے سے تین نوجوانوں کی موت واقع ہوگئی جبکہ مزید تین نوجوان شدید زخمی ہوگئے ۔
گدگ ضلع لکشمیشور تعلقہ کے سورنگی گاوں میں پیش آئے اس المناک حادثے میں ہلاک ہونے والوں کی شناخت ہنومنتا (21 سال)، مرلی (20 سال) اور نوین (21 سال) کے طور پر کی گئی ہے ۔ بتایا جاتا ہے کہ سورنگی گاوں کے کچھ نوجوانوں نے فلم اداکار ایش کے جنم دن پر مبارکبادی کا پیغام دینے کے لئے لوہے کی سلاخوں والے فریم کے ساتھ 25 فٹ کا ایک کٹ آوٹ تیار کروایا تھا جس کی تنصیب کے دوران ہائی ٹینشن کیبل بینر سے چھو گئی اور تین نوجوان موقع پر اپنی جان سے ہاتھ دھو بیٹھے ۔ تین زخمی نوجوانوں کو جنرل سرکاری اسپتال میں داخل کیا گیا ہے جن میں سے دو کی حالت سنگین بتائی جاتی ہے ۔
وزیر اعلیٰ سدارامیا نے ایک ٹویٹ کے ذریعے بتایا کہ ریاستی حکومت نے اس حادثے میں مرنے والے نوجوانوں کے خاندان والوں کو فی کس 2 لاکھ روپے اور زخمیوں کو فی کس 50 ہزار روپے معاوضہ دے گی۔
فلم اداکار ایش نے خصوصی طیارے کے ذریعے گوا سے ہوتے ہوئے ہبلی پہنچ کر متاثرہ خاندانوں سے ملاقات کے لئے سورنگی گاوں تک سفر کیا ۔ اس موقع پر ایش نے متاثرہ افراد سے اہل خانہ کے ساتھ تعزیت کا اظہار کرتے ہوئے اپنی طرف سے ہر ممکنہ تعاون کا وعدہ کیا ۔