منگلورو میں پیش آئی کار کا شیشہ توڑ کر 15لاکھ روپے اڑالے جانے کی واردات
منگلورو13/دسمبر(ایس او نیوز) شہر کے چیلمبی میں لیڈی ہل کے پاس پارک کی گئی کار کا شیشہ توڑ کر 15لاکھ روپے نقد رقم اڑا لے جانے کی واردات پیش آئی ہے۔
معلوم ہوا ہے کہ اپنے رشتے دار کے یہاں شادی کی تقریب کے سلسلے میں ساؤتھ انڈین بینک چیلمبی شاخ سے سونے کے زیورات نکالنے کی غرض سے ایک خاتون 20لاکھ روپے نقد لے کر مذکورہ مقام پر پہنچی تھی۔ اس نے یہ رقم بھی اپنے ایک دوسرے رشتے دار سے قرض لی تھی۔خاتون اور اس کے دوست پانچ لاکھ روپے نقد لے کر ساؤتھ انڈین بینک کے اندر چلے گئے۔ بقیہ پندر ہ لاکھ روپے کار کے اندر ہی رکھ چھوڑے تھے۔
کچھ لوگوں کا کہنا ہے کہ جب وہ خاتون اور اس کے ساتھی بینک کے اندر داخل ہوگئے تو موٹر بائک پر سوار ہوکر دو لوگ آئے اور انہوں نے کار کے قریب پہنچ کر کوئی کیمیکل استعمال کرتے ہوئے کار کی کھڑکی کا شیشہ توڑ ڈالا۔پھر کار میں رکھی ہوئی بیگ اٹھا کروہاں سے فرار ہوگئے۔پتہ چلا ہے کہ ان دونوں میں سے ایک نے سر پر ہیلمیٹ نہیں پہنا تھا۔
پولیس نے جائے واردات پر پہنچ کر معائنہ کیااور کیس درج کرتے ہوئے تحقیقات شروع کردی ہے۔
