بھٹکل 9/اگست (ایس او نیوز) بھٹکل کے مشہور و معروف مرکزی تعلیمی ادارے نے طلبہ کی تعلیمی ترقی کے لئے ایک نیا اقدام کرتے ہوئے ’انجمن سینٹر آف ایکسلینس‘ قائم کرنے کا فیصلہ کیا ہے۔
انجمن کے صدر جناب قاضیا محمد مزّمل کی طرف سے جاری پریس نوٹ میں اس کی تفصیلات بیان کرتے ہوئے کہا گیا ہے کہ تعلیمی سال 2020-21کے دوران اس مرکز کا قیام عمل میں آرہا ہے۔ طلباء کے اندر عمدہ تعلیمی لیاقت پیدا کرنے اورانہیں مستقبل کے تقاضوں پر پورا اترنے کے قابل بنانے کی غرض سے یہ سینٹر قائم کیا جارہا ہے جو اس علاقے میں اپنے طرز کا پہلا مرکز ہوگا۔ اوریہاں پر بھٹکل اور اطراف کے تمام طلبہ کواعلیٰ تعلیم اورعملی زندگی کے بڑے اہداف پورے کرنے کی ماہرانہ تربیت دی جائے گی۔اس کے لئے مختلف قلیل المدتی (شارٹ ٹرم) اور طویل المدتی (لانگ ٹرم)کورسس وضع کیے گئے ہیں اور ان کی تدریس و تربیت کے لئے بے حد تجربہ کار فنی ماہرین کی خدمات حاصل کی جائیں گی۔
انجمن سینٹر آف ایکسلینس میں پی یو سی طلبہ کے لئے NEET,JEE,KCETجیسے مسابقتی امتحانات میں شریک ہوکر کامیابی حاصل کرنے کے لئے خصوصی ٹریننگ دی جائے گی۔ جبکہ انجینئرنگ، سائنس، کامرس، آرٹس اور منیجمنٹ ایجوکیشن کے انڈر گریجویٹ طلبہ کے لئے ان کے میدان کی خصوصی مہارت اور ہنر مندی سکھائی جائے گی۔پوسٹ گریجویٹ طلبہ کے لئے بھی ایک جداگانہ اور مخصوص تربیتی پروگرام ہوگا۔
انجمن سینٹر آف ایکسلینس میں ’اظہار خیال کی مہارت‘(کمیونی کیشن اسکلس)کی تربیت کے لئے بھی کورسس دستیاب رہیں گے جس سے طلبہ کوانٹرویوزکا سامنا کرنے اور بڑی کمپنیوں میں ملازمتیں اور عہدے حاصل کرنے میں آسانی ہوگی۔
ایک زمانے سے ضلع شمالی کینرا میں سول سروس امتحانات کے لئے طلبہ کو خصوصی تربیت دینے والے مرکز کی کمی شدت سے محسوس کی جارہی تھی۔ اس مسئلے کو حل کرنے کی طرف بھی انجمن سینٹر آف ایکسلینس میں توجہ دی گئی ہے۔ اس طرز کی تربیت دینے والے مراکز سے اشتراک کے ساتھ انجمن کے مرکز میں آئی اے یس، آئی پی ایس کے علاوہ کے اے ایس اور کے پی ایس امتحانات کے لئے بھی طلبہ کو کوچنگ اور ٹریننگ دی جائے گی۔