بھٹکل 13/اپریل (ایس او نیوز) بھٹکل میں برادران وطن کا تہوار تیر پورے جوش و خروش کے ساتھ منایا گیا اور پورے امن کے ساتھ تیر کو ہنومنتا مندر سے کھینچ کر پھول بازار اور مین روڈ ہوتے ہوئے ماری کٹہ سے کار اسٹریٹ پر گھوم کر واپس ہنومنتا مندر لے جایا گیا۔ اس موقع پر سینکڑوں لوگوں نے شرکت کی اور تہوار سے لطف اُٹھایا۔ تیر کو کھینچ کر لے جانے کے دوران نوجوان ناچ رہے تھے اور مختلف نعرے بھی لگارہے تھے۔
تہوار کو دیکھتے ہوئے حفاظتی انتظامات کے تحت بھٹکل میں پولس کا مناسب بندوبست کیا گیا تھا، جبکہ تیر کو کھینچنے کے دوران ضلع اُترکنڑا کے ایس پی ونائک پاٹل خود کاروار سے بھٹکل پہنچ کر نگرانی کررہے تھے۔ ان کے ہمراہ بھٹکل ڈی وائی ایس پی ویلنٹائن ڈیسوزا، سرکل پولس انسپکٹر گنیش سمیت دیگر پولس حکام تہوار کے موقع پر جائے وقوع پر موجود تھے۔
خیال رہے کہ ہمیشہ کی طرح پہلے ہنومنتا مندر کے ذمہ داران عصر کی نماز سے قبل سلطان اسٹریٹ میں واقع چرکن کے گھر پہنچ کر تیر کھینچنے کی اجازت چاہی اور اُنہیں تحفتاً پھل پیش کیا۔ بعد میں قریب ساڑھے پانچ بجے دیگر رسم و رواج کے بعد تیر کو کھینچا گیا۔