بھٹکل کپڑا بینک کی خدمات قابل ستائش : حکومت اس طرح کے بینک دیگر مقامات پر بھی قائم کرے : ماحولیاتی تحفظ کمیٹی ممبر آل میترا
بھٹکل:23؍جنوری(ایس اؤ نیوز)بھٹکل کے عثمانیہ کالونی میں واقع ’’کپڑا بینک ‘‘ کا دورہ کرتے ہوئے ماحولیاتی تحفظ کمیٹی کی ممبر وکیل آل میتر ا نے کپڑا بینک کی طرف سے دی جارہی خدمات کی تفصیلی جانکاری حاصل کرنے کےبعد کہاکہ ہم حکومت سے سفارش کریں گے کہ اس طرح کے کپڑا بینک ملک کے دیگر شہروں میں بھی قائم کریں۔
دراصل ماحولیاتی تحفظ میں ہورہے سدھا ر کا جائزہ لینے بھٹکل پہنچیں آل میترا کو کپڑا بینک کے متعلق جانکاری ملی تو انہوں نے اس کو دیکھنے کی خواہش کی۔ کپڑا بینک پہنچنے کے بعد وہاں کے ذمہ دار ابوطلحہ نے جانکاری دیتے ہوئے بتایا کہ ملک بھر کے مختلف مقامات کو سماوی حادثات کے موقع پر اور ضرورت مندوں کو بھیجا جاتاہے۔ انہوں نے کس طرح پرانے کپڑوں کی تیاری کی جاتی ہے اس کی تفصیلات بھی بتائیں۔ کپڑا بینک کی طرف سے دی جارہی خدمات سے متاثر ہوئی آل میترا نے کہاکہ جہاں اس طریقے سے غریبوں کے تن ڈھانکے جاتےہیں ان کی عزت بچائی جاتی ہے وہیں اس سے ماحولیات کو بھی کافی فائدہ پہنچتا ہے یعنی کپڑوں کا کچرا نہیں ہوتا۔ انہوں نے بینک کے ذمہ داروں کو صلاح دی کہ جو کپڑے پھٹے ہوئے ہوتےہیں انہیں تھیلی بناکر استعمال کریں اور اسی تھیلی میں کپڑے دینے کی بات کہی۔ اور خوشی کا اظہار کرتے ہوئے کہاکہ میں حکومت کو دئیے جانےو الی سفارشات میں بھٹکل کپڑا بینک کا تذکرہ کرتےہوئے حکومت کو صلاح دونگی کہ وہ ملک کے دیگر شہروں میں بھی اس طرح کے بینک قائم کرتے ہوئے غریبوں اور ضرورت مندوں کی مدد کریں اور ماحولیات کا تحفظ کریں۔