بنٹوال: شوہر کی موت سے رنجیدہ خاتون نے اپنی 2جوان بچوں اور پالتو کتے کے ساتھ کرلی ندی میں کود کر خود کشی
بنٹوال30/ستمبر (ایس او نیوز) اپنے شوہر کی موت سے غمزدہ ایک خاتون نے اپنی دو جوان بچوں اور ایک پالتو کتے کے ساتھ پانے منگلورو کے پاس پُل پر سے نیتراوتی ندی میں کود کرخود کشی کرلی۔
بتایا جاتا ہے کہ میسورو پی ایس نگرکے رہنے والے خاندان کی کویتا مندنّا(55سال)،اس کے فرزند کوشک مندنّا(30سال)اور بیٹی کلپیتا مندنّا (20 سال)نے سنیچر کی شام کو پانے منگلورو پُل کے پاس کار کے ذریعے پہنچ کر یہ انتہائی قدم اس لئے اٹھایا تھاکیونکہ گھر کے سربراہ مندنّا کی موت کی وجہ سے یہ لوگ بے کسی کا شکار ہوگئے تھے۔
اپنے پالتو کتے کے ساتھ تین لوگوں کو ندی میں چھلانگ لگاتے ہوئے دیکھ کر ایک آٹو رکشہ والے نے بنٹوال پولیس کو اطلاع دی، جبکہ مقامی لوگوں نے فوری طور پر ندی میں چھلانگ لگاکر انہیں بچانے کی کوشش کی۔ تھوڑی ہی دیر میں کویتا کو ندی سے برآمد کرلیا اس وقت اس کا پالتو کتا اس سے بری طرح چمٹا ہوا تھا۔ کتا تو زندہ بچ گیالیکن اسپتال پہنچانے تک کویتا نے دم توڑ دیا۔ پولیس،فائر بریگیڈعملہ اور غوطہ خوروں کی ٹیم نے بقیہ دو بچوں کی تلاش جاری رکھی مگر دیر رات تک کوئی نتیجہ بر آمد نہ ہونے پر دوسرے دن اتوار کی صبح پھر سے تلاش شروع کی گئی۔ اس دوران کلپیتا کی لاش برآمد ہوئی جبکہ کوشک کا ابھی تک کوئی پتہ نہیں چلا ہے۔
کویتااور مندنا کے خاندان والوں کا کہنا ہے کہ کشن مندنّا کی آخری رسومات سے قبل ہی یہ تینوں اپنے گھر سے روانہ ہوگئے تھے اور پانے منگلورو پہنچ کر خود کشی کرلی تھی۔ اس کی اصل وجوہات کے بارے میں خود خاندان والے بھی لاعلمی ظاہر کررہے ہیں۔ یہ پتہ چلاہے کہ گھر سے نکلنے سے پہلے ان تینوں نے کشن مندنا کی لاش کے قریب ایک تحریر چھوڑی ہے، جس پر ”آپ کی یاد آتی ہے“ درج ہے، مزید اس میں کیا کچھ لکھا ہوا ہے اس تعلق سے پولیس یا گھر والوں نے تفصیل نہیں بتائی ہے۔کویتا گھریلو خاتون تھیں جبکہ اس کے بچوں نے انجینئرنگ میں گریجویشن کیا تھا۔پولیس ان تینوں کی خود کشی کے ساتھ ساتھ کشن مندنّا کی موت کے تعلق سے بھی تحقیقات کررہی ہے۔