شیرور کی گرین ویلی نیشنل اسکول اور کالج میں سالانہ کھیل مقابلوں کا انعقاد : کھیل کے دوران دوستی بنائیں کیونکہ دوستی ہمیشہ قائم رہتی ہے: ڈی وائی ایس پی ہری رام شنکر
بھٹکل:16؍نومبر(ایس اؤ نیوز)شیرور کی مشہور و معروف اسکول گرین ویلی نیشنل اسکول اور پی یوکالج کا سال 2019کا مشترکہ سالانہ اسپورٹس ڈے کا انعقاد 16نومبر 2019بروز سنیچر کو کالج صحن میں منعقد ہوا۔
مہمان خصوصی کی حیثیت سے کنداپور کے ڈی وائی ایس پی ،آئی پی ایس آفیسر ہری رام شنکر نے کھیل مشعل کی دیاسلائی کرتےہوئے کھیل مقابلوں کا افتتاح کیا۔ اس موقع پر انہوں نے طلبا سے خطاب کرتے ہوئے کہاکہ کھیل کو کھیل کے جذبے سے ہی کھیلیں، طلبا کے لئے ضروری اور اہم یہی ہےکہ وہ کھیل کا حصہ بنیں، ہر ایک کی قسمت میں نہیں کہ وہ انعام جیتیں۔ جب کھیل ختم ہوتو دو افراد کو دوست بنائیں کیونکہ کھیل ختم ہوجائے گا آپ کے تمغے ، اسناد تو گھرپر ہونگے یا کبھی گم ہوجائیں گے لیکن جو دوستی آپ کرتے ہیں وہ ہمیشہ آپ کے ساتھ رہے گی۔ انہوں نے آئی پی ایس میں کامیاب ہونےکا تجربہ بیان کرتے ہوئے کہاکہ پانچ سال تک بے روزگار رہتے ہوئے امتحان کی تیاری کی کیونکہ میں ٹارگیٹ بنایا تھا کہ ہر حال میں مجھے آئی پی ایس میں کامیاب ہوناتو ناکامی کو کامیابی کا پہلا زینہ مان کر آگے بڑھیں تو کامیابی آپ کے قدم چومے گی۔طلبا کو انہوں نے ہدایت دی کہ آپس میں ایک دوسرے کا موازنہ نہ کریں کیونکہ ہرایک باصلاحیت ہوتاہے مگر میدان الگ الگ ہوتےہیں ۔ طلبا اپنے پسندیدہ میدان کا انتخاب کرتےہوئے اس میں ملک وملت کی خدمت انجام دینےکاخیال ظاہرکیا۔ بین الاقوامی والی بال کھلاڑی انوپ ڈیکوستھا نے اعزازی مہمان کی حیثیت سے اپنے خیالات کااظہارکیا۔
طلبا کھلاڑیوں کی طرف مارچ پاسٹ ہوا اور مہمان خصوصی کو گارڈ آف آنر دیاگیا۔ اس کے بعد پرچم کشائی ہوئی ۔ طلبا کی طرف سے بہترین اندازمیں منظم طور پر ڈرل پیش کیاگیا جس کی سبھوں نے ستائش کی۔ڈائس پروگرام کے بعدطلبا کے درمیان کھیل مقابلوں کا انعقاد ہوا۔ آخر جیت حاصل کرنےو الے طلبا کھلاڑیوں کےدرمیان انعامات کی تقسیم کی گئی۔ اسکول اور کالج پرنسپال جان میتھو نے پروگرام کی صدارت کی ۔ اس موقع پر سید صاحب اور جفری صاحب سمیت اساتذہ وغیرہ موجود تھے۔