بھٹکل:13؍جون(ایس اؤ نیوز) ریاستی حکومت نے 14جون تک ریاست بھر میں  جو کورونا لاک ڈاؤن نافذ کیا تھا، اس  میں  ضروری اشیاء کی خریداری کے اوقات میں توسیع  کرنے کا اعلان کیا گیا ہے ، ساتھ ہی  کئی ایک سہولیات بھی  فراہم کرنے کا اعلان کیا گیا ہے اور لاک ڈاون کی میعاد میں   21جون تک توسیع کی گئی  ہے۔ 

ریاستی حکومت کی گائڈ لائنس کے پس منظر میں ضلع شمالی کینرا کے ڈپٹی کمشنر مولئی موہیلن نے ویڈیو کانفرنسنگ کے ذریعہ اخباری نمائندوں  کو  بتایا کہ کل  پیر   14 جون  سے 21جون تک  کورونا لاک ڈاون میں توسیع کی گئی ہے، البتہ  پیر سے جمعہ  تک ،   صبح 8 بجے  سے دوپہر 2 بجے تک اشیائے ضروریہ کی خریداری کے لئے  چھوٹ رہے گی اور  شام 7 بجے سے صبح 5 بجے تک رات کا کرفیو  جاری رہے گا اسی کے ساتھ  ہفتہ میں  صرف دو  دن یعنی سنیچراور اتوار کو مکمل لاک ڈاون رہے گا   اور اسے سختی کے ساتھ لاگو کیا جائے گا۔

اس چھوٹ کے دوران سابقہ حکم کے مطابق مچھلی، گوشت، ترکاری، اناج، دودھ اور اس سے متعلقہ اشیاء کی دکانیں کھلی رکھی جاسکیں گی۔ اس کے علاوہ سڑک کنارے بیوپار کرنے والوں، چشمہ کی دکانوں اور پبلک ڈسٹریبیوشن یعنی راشن کی دکانوں کو بھی اسی وقفہ تک کھلا رکھنے کی اجازت ہوگی۔ انڈسٹریز میں 50 فیصدی  اور گارمنٹ فیکٹریوں میں 30 فیصد ملازمین کے ساتھ  سرگرمیاں جاری رکھی جاسکیں گی۔ ہوم ڈیلیوری کی سہولت 24X7 جاری رکھی جاسکے گی۔ ٹیکسیوں اور رکشہ میں صرف دو مسافروں کے لئے سفر کرنے کی اجازت ہوگی۔ ضلع ڈی سی کے حکم کے مطابق شمالی کینرا میں اس عرصہ کے دوران شادیوں کی تقریبات منعقد کرنے کے لئے اجازت نہیں دی جائے گی، البتہ  میڈیکل اور ایمرجنسی سروس والے شعبہ جات حسب معمول اپنی خدمات انجام دے سکیں گے  اسی طرح   جاگنگ کے لئے صبح 5بجے سے 10بجے تک پارک بھی کھولےجائیں گے۔  آٹو رکشا والے دو مسافروں کے ساتھ سفر کرسکتے ہیں۔   خیال رہےکہ ان اوقات اور مدت میں بھی شادی بیاہ کے لئے  اجازت نہیں ہوگی۔

ڈھیل دئیے گئےاوقات میں کووڈ گائیڈ لائنس کی ہدایات پر عمل آوری کی مقامی انتظامیہ اور پولس نگرانی کرے گی۔ انہوں نے یہ بھی بتایا کہ  تحصیلداروں کو ذمہ داری دی گئی ہے کہ وہ اپنے اپنے  تعلقہ جات میں اُن علاقوں کو   مائیکرو کنٹین منٹ زون قرار دے کر مکمل لاک ڈاؤن نافذ کرسکتے ہیں جہاں  کورونا کے مریضوں میں اضافہ ہونےکا خدشہ ہو۔اسی طرح  اُن علاقوں میں  روزمرہ کا  ضروری سامان پہنچانے  کی  ذمہ داری بھی  مقامی انتظامیہ کی  ہوگی۔

ڈی سی نے عوام سے اپیل کی کہ وہ   کووڈ گائیڈلائنس پر  مکمل طور پر عمل  کریں۔ ماسک پہننے سمیت  سماجی فاصلہ برقرار رکھنے  کا خیال رکھیں۔ طبیعت میں کچھ تبدیلی ہوتی ہےتو فوری طورپر اسپتال کا رخ کریں اور اپنی صحت کو لے کر لاپرواہی نہ برتیں۔ اس موقع پر انہوں نے متنبہ  کیا کہ کووڈگائیڈ لائنس کی خلاف ورزی کرنے  پر دفعہ 188اور وبائی مرض قانون 2020کے 4،5اور10کے تحت کارروائی کی جائے گی۔

خیال رہے کہ ریاست کے دیگر اضلاع میں  صبح چھ بجے سے دوپہر دو بجے تک  عوام کو خریدوفروخت کی اجازت دی گئی ہے، لیکن ضلع اُترکنڑا کے ڈپٹی کمشنر ملئے مہیلن نے واضح کیا ہے کہ ضلع میں صبح آٹھ بجے سے دوپہر دو بجے تک  عوام کو خریدوفروخت کی اجازت ہوگی۔