سعودی وزارت ثقافت کی جانب سے’نیشنل تھیٹر پروجیکٹ‘کا آغاز
ریاض،29جنوری(آئی این ایس انڈیا)سعودی عرب میں وزارت ثقافت کے زیر انتظام ’نیشنل تھیٹر پروجیکٹ‘ کا آغاز ہو گیا ہے۔ پروجیکٹ کے آغاز کا اعلان منگل کی شام درالحکومت ریاض کے ’کنگ فہد کلچرل سینٹر‘ میں وزیر ثقافت شہزادہ بدر بن عبداللہ بن فرحان کی سرپرستی میں ہوا۔ اس موقع پر نامور فن کاروں، دانش وروں اور سعودی عرب سمیت عرب دنیا میں تھیٹر میں خصوصی دلچسپی رکھنے والی شخصیات کے علاوہ معاشرے کے مختلف طبقات سے تعلق رکھنے والے عوام کی بڑی تعداد موجود تھی۔تقریب سے خطاب کرتے ہوئے شہزادہ بدر نے کہا کہ ’نیشنل تھیٹر پروجیکٹ‘ ایسے وقت میں سامنے آیا ہے جب سعودی عرب میں ثقافت کا سیکٹر اپنے بہترین دور سے گزر رہا ہے۔ اس سلسلے میں مملکت کے فرماں روا شاہ سلمان بن عبدالعزیز آل سعود اور علی عہد شہزادہ محمد بن سلمان کی جانب سے غیر معمولی سپورٹ دیکھنے میں آئی ہے۔سعودی وزیر نے باور کرایا کہ وزارت ثقافت اس بات کے لیے کوشاں ہے کہ نیشنل تھیٹر پروجیکٹ ملک میں پرفارمنگ آرٹس میں جدّت کی قیادت کرے... اور مقامی سطح کے تھیٹر کو عالمی معیار تک پہنچا دے۔سعودی وزیر ثقافت کے بعد’نیشنل تھیٹر پروجیکٹ‘ کے سربراہ عبدالعزیز السماعیل نے حاضرین کے سامنے خطاب کیا۔انہوں نے خطاب میں اس پروجیکٹ کے اہداف و مقاصد پیش کیے۔نیشنل تھیٹر پروجیکٹ کو مملکت میں تھیٹر کے ایک مربوط نظام کی تاسیس کی جانب پہلا عملی قدم شمار کیا جا رہا ہے۔ ایک ایسانظام جو اعلی معیار کی تھیٹر پروڈکشن کو یقینی بنائے اور تھیٹر کے فن کاروں کو اعلی فنی معیار کے مطابق اپنی صلاحیتوں کے مظاہرے کا بڑا موقع فراہم کرے۔