جدہ،17؍جولائی(ایس او نیوز؍ایجنسی) سعودی عرب میں گذشتہ 24 گھنٹے میں کرونا وائرس کے 2764 نئے کیسوں کی تشخیص ہوئی ہے اور کووِڈ-19 کے مرض میں مبتلا 45 افراد وفات پاگئے ہیں۔

سعودی وزارت صحت کے حکام نے جمعرات کے روز بتایا ہے کہ کرونا وائرس کا شکار مزید 4574 افراد صحت یاب ہوگئے ہیں اور اب تک تن درست ہونے والے مریضوں کی تعداد 187622 ہوگئی ہے۔

وزارت صحت کے مطابق کرونا وائرس کے نئے مریضوں کی تشخیص کے بعد مملکت میں اب کل کیسوں کی تعداد 243238 ہوگئی ہے۔ ان میں اس وقت 53246 فعال کیس ہیں اور ان میں سے 2206 کی حالت تشویش ناک بتائی جاتی ہے۔وہ مختلف اسپتالوں میں زیر علاج ہیں جبکہ سعودی عرب میں کرونا کی وَبا پھیلنے کے بعد سے 2370 مریض وفات پا چکے ہیں۔

وزارت صحت کے طبی عملہ نے اب تک ملک بھر میں 2494873 افراد کے کرونا وائرس کے ٹیسٹ کیے ہیں۔ ان میں سے کووِڈ-19 کے 28190 ٹیسٹ گذشتہ 24 گھنٹے میں کیے گئے ہیں۔

وزارت صحت کے ترجمان ڈاکٹر محمد العبد العالی نے بتایا ہے کہ جمعرات کوجن نئے کیسوں کی تشخیص ہوئی ہے ، ان میں 61 فی صد مرد حضرات اور 39 فی صد خواتین ہیں۔ان میں ضعیف العمر افراد کی تعداد 5 فی صد اور بچوں کی 10 فی صد ہے، 85 فی صد نئے مریض نوجوان اور ادھیڑ عمر کے افراد ہیں۔

ترجمان نے مشورہ دیا ہے کہ ’’جو کوئی بھی ضعیف العمر افراد کی دیکھ بھال کررہا ہے،اس کو چہرے پر ماسک ضرور پہننا چاہیے ، وقفے وقفے سے ہاتھ دھونے چاہییں۔ سماجی فاصلہ اختیار کرنے کے ضابطے کی پاسداری کرنی چاہیے اور ذاتی استعمال کی اشیاء کا دوسروں سے تبادلہ نہیں کرنا چاہیے۔‘‘