ریاض،23؍جولائی (ایس او نیوز؍ایجنسی) سعودی عرب کی وزارت صحت نے گذشتہ 24 گھنٹے میں کرونا وائرس کے 2238 نئے کیسوں کی تصدیق کی ہے اور اب مملکت میں کل کیسوں کی تعداد 260394 ہوگئی ہے۔

وزارتِ صحت کے مطابق کووِڈ-19 کےمزید 34 مریض مختلف پیچیدگیاں پیدا ہونے کے بعد وفات پا گئے ہیں اور جمعرات تک وفات پانے والے مریضوں کی تعداد 2635 ہوگئی ہے۔

وزارت صحت کے ترجمان ڈاکٹر محمد العبد العالی نے بتایا ہے کہ کرونا وائرس کا شکار مزید 3092 مریض صحت یاب ہوگئے ہیں۔ 23 جولائی تک سعودی عرب میں اس مہلک وائرس کا شکار 213490 مریض صحت یاب ہوچکے ہیں۔

انھوں نے بتایا ہے کہ سعودی عرب میں کرونا وائرس کے تیس لاکھ ٹیسٹ کیے جاچکے ہیں۔ انھوں نے شہریوں کو خبردار کیا ہے کہ وہ عیدالاضحیٰ کے موقع پر اس مہلک وائرس سے بچاؤ کے لیے اجتماعات سے گریز کریں۔

انھوں نے کہا کہ ’’آنے دنوں میں ملاقاتوں اور اجتماعات کے متعدد مواقع آئیں گے لیکن ہم انھیں کسی مشکل یا مصیبت کا سبب بنتے نہیں دیکھنا چاہتے۔‘‘

حکومت نے کرونا وائرس کی وَبا پھیلنے کے خطرے کے پیش نظر مکہ مکرمہ میں مسجد الحرام کو 9 اور10 ذی الحجہ کو حج کے رکن اعظم یومِ عرفہ اور عید الاضحیٰ کے دن عام عبادت گزاروں کے لیے بند رکھنے کا فیصلہ کیا ہے۔

مسجد الحرام کی حج سکیورٹی کے نائب کمانڈر میجر جنرل محمد بن واصل الاحمدی نے بدھ کو ایک بیان میں کہا کہ ’’مسجد الحرام اور اس کے بیرونی صحنوں میں نمازوں کی معطلی بدستور جاری رہے گی اور ہم مکہ مکرمہ کے مکینوں کو یہ دعوت دیتے ہیں کہ وہ یومِ عرفہ پر روزہ اپنے گھروں ہی میں افطار کریں۔‘‘

سعودی حکومت نے حالیہ ہفتوں کے دوران میں کرونا وائرس کو پھیلنے سے روکنے کے لیے عاید کردہ بہت سی پابندیاں ختم کردی ہیں یا ان میں نرمی کردی ہے لیکن اس نے ہنوز بین الاقوامی پروازوں کی بحالی سے متعلق کوئی اعلان نہیں کیا ہے۔