ستیش سائیل اور اسنوٹیکر کے درمیان بات چیت ہوئی نتیجہ خیز۔ 10دن تک حلقے میں کریں گے انتخابی تشہیر
کاروار 9؍اپریل ( ایس او نیوز) شمالی کینرا میں جنتا دل اور کانگریس کے مشترکہ امیدوارآنند اسنوٹیکر اور کاروار انکولہ کے سابق رکن اسمبلی ستیش سائیل کے درمیان باہمی گفتگو نتیجہ خیز رہی ، جس کے بعد ستیش سائیل نے آئندہ دس دن تک اسنوٹیکر کے لئے انتخابی مہم میں حصہ لینے پر رضامندی ظاہر کی ہے۔
باخبر ذرائع سے ملنے والی اطلاع کے مطابق پارلیمانی امیدوار پچھلے کچھ دنوں سے سابق رکن اسمبلی ستیش سائیل سے ملنے اور باہمی گفتگو کرنے کی کوشش کررہے تھے ، مگر ستیش اس کا موقع نہیں دے رہے تھے۔لیکن سوموار کے دن صبح کے وقت آنند اسنوٹیکر سیدھے ستیش کے گھر پہنچ گئے اوراپنے لئے انتخاب مہم میں حصہ لینے کی گزارش کی۔اس موقع پر بلاک کانگریس صدر سمیر نائک کے علاوہ آنند اسنوٹیکر کے حامی کارکنان موجود تھے۔کافی دیر تک باہمی گفتگو کے بعد ستیش سائیل نے انتخابی مہم میں حصہ لینے کی ہامی بھری ہے۔لیکن ایک بات واضح کردی کہ یہ باہمی مہم اور تعلقات صرف انتخاب کے اختتام ہونگے اس کے بعد ہم لوگ کانگریس اور تم سب جنتادل کے کارکن بن جائیں گے ، اس لئے کہ ہمیں اپنی پارٹی کو مستحکم کرنے کی طرف توجہ دینا ہے۔معلوم ہوا ہے کہ ستیش کی یہ صاف اور واضح شرط کو آنند اسنوٹیکر نے مان لی ہے۔
