بھٹکل 12 / دسمبر (ایس او نیوز) تعلقہ کے منڈلّی گرام میں جوگی منے علاقے میں تنہا رہنے والی بیوہ کے گھر کو نشانہ بنا کر ڈکیتی اور قتل کی واردات انجام دینے کی کوشش کی گئی.
موصولہ رپورٹ کے مطابق شوبھا ایم دیکشت (71 سال) اپنے گھر میں تنہا رہتی ہے ۔ اس کا بیٹا اڈپی میں ملازمت کرتا ہے ۔ اس بات کا فائدہ اٹھاتے ہوئے گھر کی اوپر بالکنی کا دروازہ کھول کر چور اندر داخل ہوئے اور نیچے ہال میں ٹی وی دیکھنے میں مصروف شوبھا کے گلے میں کپڑے کا پھندہ ڈال کر اسے جان سے مارنے کی کوشش کی ۔ اس دوران شوبھا نے بڑی زور سے شور مچانا شروع کیا تو چور گھبرا گئے اور جس راستے سے گھر میں داخل ہوئے تھے وہیں سے فرار ہوگئے ۔ بیوہ خاتون کی ناک پر ہلکا سا زخم آیا اور وہ اپنی جان بچانے میں کامیاب ہوگئی ۔
معلوم ہوا ہے کہ پچھلے پندرہ دن قبل ہی شوبھا کے گھر سے ایک سونے کی چوڑی، ایک چین اور ایک انگوٹھی گم ہوئی تھی ۔
ڈکیتی کی اس ناکام واردات کے تعلق سے شوبھا کے بیٹے ہریش نے بھٹکل مضافاتی پولیس تھانے میں شکایت درج کروائی ہے ۔ سرکل انسپکٹر چندن گوپال نے تفتیشی افسر کے طور پر کارروائی شروع کی ہے ۔